By Helen Castaño | 10:21 AM January 21, 2026
Gipamatud-an sa independent anti-corruption advocacy group nga Truth and Integrity Network (TIN) nga walay ghost projects ug walay substandard nga mga proyekto sa ikatulong distrito sa Bohol, human sa ilang on-site inspection ug komprehensibong pagrepaso sa mga proyekto sa gobyerno sa maong distrito.
Sa balitang napatik sa The Manila Times ug Philippine Star, giingon ni Andres Tiangco, tigpamaba ug Executive Director sa TIN, nga ang tanang proyekto nga ilang gi-inspeksyon sa distrito ni Rep. Alexie Besas- Tutor tinuod, hapsay ang kalidad, ug kompleto ang dokumentasyon.
Hugot usab nga gihimakak sa TIN ang mga pasangil sa pakigkunsabo o bid-rigging batok kang Rep. Tutor ug Rep. Edwin Gardiola, sa pag-ingon nga walay bisan unsang ebidensya nga mosuporta sa maong mga alegasyon.
Sumala sa grupo, ang tanang proyekto nakaagi sa hustong proseso sa public bidding, gipatuman sa mga may katungdanang ahensya sa nasyonal nga gobyerno, ug na-validate o gi-clear sa mga state auditor subay sa kasamtangang mga balaod ug regulasyon.
Gipasiugda usab sa TIN nga walay direktang partisipasyon si Rep. Tutor sa aktuwal nga implementasyon sa mga proyekto.
Isip kabahin sa inspeksyon, nagpahigayon usab ang TIN og random nga mga interbyu sa mga residente sa Bohol 3rd District. Ang mga interbyu nagpakita nga kadaghanan sa mga residente kontento ug midayeg sa performance ni Tutor, ilabina sa iyang aktibong paghatag og atensyon sa mga proyekto nga tinud-anay nga gikinahanglan sa komunidad, lakip ang social services nga diretso nga nakatabang sa katawhan.
Sumala sa pipila ka mga residente, daghang proyekto ang natuman tungod sa makanunayon nga pagpaningkamot sa kongresista sa pagpatuman sa mga prayoridad sa distrito. Ang uban pa miingon nga sobra ra ang mga pasangil ug “fake news” batok sa ilang representante, tungod kay personal nilang nasaksihan ang iyang serbisyo ug presensya sa komunidad.
Sa katapusan, gipadayag sa TIN nga ipadayon nila ang ilang fact-based inspections sa ubang mga lugar aron masiguro ang transparency, accountability, ug patas nga paghukom sa paggamit sa pondo sa publiko.
