By I. Inojales | 03:04 PM July 19, 2025
INABANGA, BOHOL – Usa ka dako nga kadaugan batok sa ilegal nga droga ang nakuha sa kapulisan sa Bohol human masikop ang usa ka high-value individual (HVI) ug makumpiska ang gibanabana nga usa ka kilo sa gituhang shabu nga nagkantidad og P6.8 milyon atol sa usa ka buy-bust operation sa Barangay Tungod, Inabanga, Bohol niadtong Huwebes, Hulyo 17, 2025, alas 11:50 sa gabii.
Ang suspetsado usa ka 22-anyos nga Grade 10 student, single, walay trabaho, ug lumolupyo sa Barangay Mantatao, Calape, Bohol.
Gibanabana nga ang gituhang shabu nga nasakmit gikan kaniya mokantidad og P6.8 milyon base sa Standard Drug Price.
Ang operasyon gipangulohan ni Police Captain Albert Sator, hepe sa Inabanga MPS, kauban ang Provincial Intelligence Unit (PIU) ug Provincial Drug Enforcement Unit (PDEU) nga gipangulohan ni Lt. Col. Joemar Pomarejos, ubos sa panggamhanan ni Col. Arnel Banzon, Provincial Director sa Bohol Police Provincial Office (BPPO), uban ang suporta sa RID7.
“Kini nga kalampusan usa ka klaro nga pahimangno sa tanang nagpadayon sa ilang kalihokan sa ilegal nga druga—hapit na ang inyong kataposan. Ang pagkasikop sa usa ka high-value target usa ka dakong kadaugan para sa katawhan sa Bohol, ” matod ni Banzon sa iyang pamahayag.
“Makakasalig ang katawhan nga magpadayon ang kapulisan sa Bohol sa ilang walay hunong nga kampanya batok sa ilegal nga droga. Dili mi mopahunong hangtod makab-ot nato ang luwas ug limpyo nga Bohol,” dugang ni Lt. Col. Norman Nuez, tigpamaba sa BPPO.
Ang maong operasyon nagpamatood sa kagustuhan ug kakugi sa kapulisan nga mapanalipdan ang katawhan sa kadaot nga dala sa ilegal nga droga.
