By I. Inojales | 10:03 PM July 04, 2025
PANGLAO, BOHOL — Usa ka lalaki nga taga-Talibon ang nag-atubang karon og daghang kasong kriminal human siya misamok sa usa ka fast food establishment sa Barangay Tawala, Panglao, ug misumbag pa og pulis nga mitubag sa insidente niadtong Huwebes, Hulyo 3.
Sumala sa Bohol Police Provincial Office (BPPO), ang suspetsado — nga usa ka legal age nga lalaki — kasong Direct Assault, Alarms and Scandals, ug uban pang may kalabutan nga mga kasal-anan ang ipasaka batok kaniya.
Nahitabo ang insidente pasado 12:50 sa udto, base sa report sa Bohol Tourist Police Unit (BTPU) sa Panglao, human ang security guard sa maong establisemento mipahibalo sa kapulisan nga adunay lalaking nagsamok, nanghasi ug naghagit og gubot sulod sa tindahan.
Pag-abot sa duha ka police responders, ilang nasaksihan nga ang suspetsado nagpadayon sa pagsaba, pagpanghulga sa mga crew ug customers. Gisuwayan siya’g pakalmahan apan misukol kini ug kalit nga misumbag sa baba sa usa ka pulis. Nagpadayon gihapon siya sa pagsukol ug paghasik og kasamok hangtod nga siya napugngan ug nadakpan sa mga otoridad.
Gidala dayon siya sa Panglao Police Station, diin gipasabot kaniya ang iyang mga katungod isip suspetsado.
Si Police Colonel Arnel Balagat Banzon, ang provincial director sa BPPO, mipadayag sa iyang pagpasalamat sa paspas ug husto nga aksyon sa mga pulis nga mitubag sa maong hitabo. Gipasabot usab niya nga nasunod ang mga polisiya sa PNP sa pagresponde sa insidente ug andam sila sa bisan unsang imbestigasyon nga ipahigayon.
“Pahimangno kini nga ang pagsamok ug pagpanagpas batok sa mga otoridad dili pasagdan. Padayon ang BPPO sa pagpanalipod sa katawhan ug sa kalinaw sa komunidad,” matod ni Banzon.
Padayon ang preparasyon sa mga pagpangandam sa pagsampa og kaso sa piskalya samtang ang suspetsado nagpabilin sa kustodiya sa kapulisan.
