By PIA-Bohol | 10:10 AM March 27, 2025
Upat ka bag-ong polymer nga kwarta nag salapi sa katumbas sa usa ka libo ka pesos, lima ka gatus ka pesos, usa ka gatus sa pesos yug laing nga P50 ang gisugdan og pagpakatag sa Bango Sentral nga Pilipinas sugod niadtong buwan sa Pebrero.
Ang mga bag-ong kwarta nga dagway og plastic, o polymer series, gihimo subay usab sa programa sa goberno dungan sa financial education ug financial literacy program, matud pa ni Anna Carla Oville, BSP Visayas governor, didto sa Kapihan sa PIA.
Ang us aka libo nga polymer, may asul ang kolor, ang P500 kolor gold, ang P100 kolor kinampay ug ang P50 kolor puwa.
Sa pagpagawas sa kwarta nga polymer, gibutyag sa BSP nga wala usab sila hinuoy laraw nga wagtangon na ang kwarta nga papel sa sirkulasyon, bisan namapatud-an na nga ang kwarta nga polymer mas molungtad og ka limoa ka pilo kon itandi sa kwarta nga papel.
Sa nagkakomplikado usab nga kalibutan sa pagpangpeke sa kwarta, ang polymer series maoy tubag sa kagamhanan kay kini mas lisud nga pekehon tungod sa gisukip nga mga security features niini.
Ug tungod kay dagway og plastic, mas limpyo ang bag-ong kwarta kay dili dali mabuling, pwede nga iagi sa dis-infection nga dili dali madaut, ug dali nga trapohan aron maseguro nga dili hugaw.
Ug kay ginama sa polymer nga mura og plastic, mas lig-on kini, dili malate sa tubig mao nga dili dali magay-ot kon gamiton sa mga lab-asera sa mga kamerkadohan nga mag baligya nga mga basa o karne nga may lanay sa dugo.
Gawas pa, pinaagi sa bag-o nga kwarta, gipakayab sa goberno ang mga talagsaon nga tanum ug mga hayop sa nasud, aron ipakatap usab ang kaalam kabahin sa pagpanalipod niining mga buhilaman, dayag sa BSP.
Ug alang sa mga may kabilinggan sa panan-aw, giseguro usab sa BSP nga dili malinga ang mga naghupot niining mga bag-ong kwarta kay gipasukip sa paghimo sa salapi nga polymer ang tactile dots o sama o Braille dots nga mahikap aron mailhan kon pila ang balor sa salapi.
Sa bag-ong polymer nga usa ka libo ka pesos, aduna kini lima ka gagmay nga burot, ang 500, may upat ka gagmay nga burot, ang P100 may tulo ug ang P50 may usa ka borot nga mahinol. (PIABohol)
