By PIA-Bohol | 08:38 PM March 18, 2025
Importante ang dinali-an nga pagtaho ug pagpahimutang sa kwarantina dayon sa dili pa ikapagawas sa mga natungdan nga nanghinaot nga mahalin pa ang ilang mga baboy, kini maoy sugyot sa obserbasyon sa Office of the Provincial Veterinarian (OPV), sa nagpadayon nga pagkatag sa sakit sa baboy nga may kapasidad nga mopuo sa mga baboyan sa Bohol.
Kritikal ang panahon sugod sa higayon nga may mamatikdan nga pagkasakit, nga dili na magpaabut pa nga mograbe, kinahanglang ikareport na dayun, aghat ni Livestock Operations Officer Romulo Garcia sa OPV.
Ang pagpalabay sa panahon aron mag-obserba, mas makahatag og higayon sa kagaw nga makatabok sa lain nga baboyan, ug maka-aghat pa sa mga mamalitay og baboy sa pagpamalit sa barato nga presyo dala ang ilang mga kargahanan nga walay disinfection, segun pa sa obserbasyon sa mga nagbantay sa mga ASF control points.
Sa kasinatian sa African Swine Fever infection didto sa San Miguel, Ubay, ug Carmen, napakita sa mga tinugyanan ug natungdan nga mag-uuma nga ang paghimo og kwarantina sugod sa kritikal nga panahon, epektibo nga makapababoy sa kagaw nagdto na sa ilang kamatayon pinaagi sa dis-infection.
Kini maoy gipaambit sa Office of the Provincial Veterinarian (OPV) pinaagi ni Livestock Operations Officer Romulo Garcia, sa pagpakighinabi dili pa lamang dugay.
Sa kaso sa San Miguel, nga maoy unang hugna sa pagkatakod sa sakit sa 2025, naapsan ra sa mga tinugyanan ang kappugong sa pagkatag sa sakit sa baboy didto sa San Vicente, Bayongan, Cambangay Norte ug Bugang. Wala nay kaso sa ASF ang San Miguel.
Sa Ubay, kontrolado sa kritikal nga kwarantina ang kaso sa ASF didto sa Los Angeles, San Francisco, Bulilis, Governor Boyles, Villa Teresita, Humayhumay, Pangpang ug Gabi, ug wala na usab namatikdan nga kaso sa mga silingang lugar niini.
Sa Carmen, solbad na ang kaso sa ASF sa Buenos Aires, Nueva Vida Norte ug sa Tamboan.
Sa Batuan, gikan sa kaso sa Poblacion Sur, Poblacion Norte, Poblacion Vieja, Cantigdas, Quezon, Sta Cruz, dagway og may napalusot nga nga karne o buhi nga baboy nga nagpositibo sa sakit sa wala pa maplastar ang kwarantina kay nakagawas sa Upper Cabacnitan ang sakit sa baboy nga makamatay.
Sa Pilar, solbad na unta ang kaso sa ASF sa San Vicente, ug sayo niining tuig sa La Suerte, apan may nakapalusot kay makapanakod pa kini didto sa San Isidro.
Sa Trinidad, gikan sa namatikdan nga mga kaso sa M. Roxas, Soom ug Causwagan, nakawang ang pagkwarantina kay may nakagawas na nga kagaw nga nakapanakod didto sa Poblacion, San Vicente, La Union, Guinobatan, La Victoria ug Kinan-oan.
Sa Bilar, solbad na unta ang mga kaso sa Daogohoy, Bugang Sur ug Bugang Norte, apan nakaipsot pa gihapon ang kagaw sa palusot ngadto na sa Campagao.
Sa pagkakaron, ang ASF sa Bohol nakakatag na sa 9 ka mga lungsod nga kasamtangang luwas unta sa sakit. Kini ang Talibon, Dagohoy, Bien Unido, Tagbilaran, Panglao, Catigbian, Loboc, Maribojoc ug Getafe. (PIABohol)
