By Ric Obedencio | 09:13 AM December 03, 2022
Si Gob. Aris Aumentado mituman sa iyang kaakohan nga dalhon niya ang provincial government ngadto sa katawhan sa kalungsuran pinaagi sa “Greet and Meet” o paghimamat ug pagtimabaya.
Matud sa gobernador sa iyang pamulong nga ang paghimamat ug pagtimbaya mao ang pagdala sa mga serbisyo ngadto sa katawhan mismo kay siya ug mga opisyal mga sulogoon lamang ug ang katawhan mao ang gobiyerno.
Ug mao kini ang nahitabo kaganina sa hapon (Nov. 29) sa mga lungsod sa Garcia-Hernandez ug Valencia diin gihimamat niya ang mga opisyal sa lungsod, barangay kapitan, barangay livestock aides (BALA), barangay nutrition workers ug senior citizens.
Siya gi-abi-abi nil ani Mayor Jess Baja sa G-Hernandez ug Mayor Neil Balite sa Valencia ug mga sakop sa Sangguniang Bayan uban sa ilang bise-mayores.
Susama ang iyang gihimo sa lungsod sa Anda pinangunahan ni Mayor Inday Simacio, Guindulman ni Mayor Ben Balo ug Dimiao pinaagi ni Mayor King Ang gahapon (Nobiyembre 28, 2022).
Atol sa maong kalihokan mao ang pag-apod-apod sa tag-P25,000 barangay aid sa matag baryo ug mga honorarium sa mga BaLA ug nutrition workers sa matag barangay.
Kuyog sa gobernador mao ang mga tinugyanan sa provincial health office, office of the provincial veterinarian, provincial treasurer’s office ug mga executive assistants kanhi Mabini Mayor Rances ug Oscar Valles aron sa pagpatin-aw og dugang sa serbisyong hatud sa kagamhanang probinsyal.
Sa sunod tuig ipa-apod-apod niya ang tag-P200,000 nga balor sa proyekto sa kada barangay, apan, dili tanan ang mahatagan nianang tuiga tungod sa niubos nga pahat sa lalawigan sa National tax allocation (kanhi internal revenue allotment (IRA). Apan, aporon kining 1,109 ka mga barangay sa 2024 niining P200,000, matud sa gobernador. (rvo)