By BIN Staff | 06:10 PM February 02, 2025
Kusganon nga gisaway sa Bohol Provincial Police Office (PNP Bohol) ang pagkaylap sa pekeng balita sa social media, ilabi na ang usa ka bakak nga post gikan sa Bohol News Alert.
Ang maong post nagpakaylap og sayop nga impormasyon nga ang anak ni Board Member Mimi Boniel nadakpan sa usa ka anti-drug operation.
Gusto sa PNP Bohol nga ipahibalo sa publiko nga kini nga impormasyon wala’y kamatuoran ug walay basehan. Gidasig namo ang tanan nga magmatngon ug siguraduhon nga tukma ug tinood ang impormasyon nga ilang tuohan ug ipakaylap sa social media.
Matud sa BPOO, ang pagpakaylap sa bakak nga balita makahatag og walay pulos nga kagubot ug kadaot sa mga tawo ug ilang pamilya.
Gipahinumduman sa kapulisan ang tanan nga musalig lamang sa opisyal nga tinubdan sama sa mga ahensya sa gobyerno, kapulisan, ug mga lehitimong media outlets aron makakuha og sakto ug kasaligan nga impormasyon.
“Padayon nga nagapasiugda ang PNP Bohol sa kalinaw ug kasiguruhan sa atong probinsya. Gihangyo namo ang publiko nga likayan ang pagkatag og di tinuod nga impormasyon ky bisan kinsa nga madakpan nga nagpakaylap og pekeng balita mahimong atubangon ang hustisya subay sa balaod,” matud sa BPPO.
