By Rey Anthony Chiu | 08:57 AM December 04, 2024
Kon moabut ang Disyembre 10 ug wala nay lain pang mga baboy nga nagpakita nga positibo sa African Swine Fever (ASF), mahimong malibkas na ang mga kwarantina nga gipatuman aron mapugngan ang pagkatag sa kagaw didto sa mga barangay sa San Miguel Bohol.
Kini maoy napagawas nga kasayuran gikan sa Bohol ASF Task Force sa ilang tigum dili pa lamang dugay.
Kahinumduman nga niadtong Nobyembre 21, nadawat sa Office of the Provincial Veterinarian (OPV) ang hangyo sa kompirmasyon kabahin sa mga nangasakit ug nangamatay nga mga baboy didto sa San Vicente, San Miguel.
Diha nga giadto sa composite team sa OPV ug nakuhaan og blood samples ang mga baboy nga nangasakit, tulo sa 16 ka blood samples ang mingpositibo sa ASF.
Didto, gidayon na og sirado ang usa ka gatus ka metros gikan sa mga tangkal diin nakuha ang mga blood samples nga nagpositibo, ug gipugngan na ang pagpasulod ug pagpagawas sa mga baboy, karne man o buhi pa.
Us aka Executive Order usab nga gipagawas ni Gob Erico Aristotle Aumentado nga mando sa paghimo og pagpamatay sa mga baboy sulod sa 100 ka metros gikan sa tangkal nga mag nagpositibo, u gang paghimo og testing sa mga baboy nga anaa sa 500 ka metros gikan sa mga tangkal nga nagpositibo, aron ilhon kon nakagawas ba ang kagaw nga makapatay sa mga baboy ug makapuo niini.
Sa kahadlok usab nga sila ang maka-angin, mihukom dayon ang mga katawhan nga namuhi og baboy didto nga ipapatay na lamang ang ilang mga buhi, kay sa mapuo ang P5 bilyones nga industriya sa pangbaboyan sa Bohol, kon makatakod ang sakit.
Sa sulod sa 500 metros, may mga lugar na niini nga nasulod na sa mga silingan nga barangay sa San Miguel, ug dinhi nakuha ang 178 ka blood samples apan nagnegatibo na kini sa ASF.
Kini usab human may 306 na ka baboy gikan sa 130 ka mga kabalayan ang gipangpatay ug gilubong na dayon, segun sa taho sa OPV.
Lain pa usab nga 45 ka baboy ang patyonon pa, sanglit nasulod sila sa 100 metros gikan sa nagpositibo sa sakit.
Dugang sa OPV, negatibop usab ang gitesting nga random samples gikan sa Cambangay, Bayongan, Poblacion, ug San Isidro, samtang nagdagway na og kon makalabang ang San Miguel sa 15 ka adlaw human sa Nobyembre 21, nagpasabut lamang nga malampuson ang gihimo nga kwarantina dinhi, matud ni Provincial Officer in Charge veterinarian Dr. Meydallen Paman.
Dugang usab ni OPV ASF Head of Operations Romulo Garcia, subay sa Department of Agriculture- Animal Bureau Industry (DA-BAI) guidelines, dili na ideklara ang San Miguel isip Red Zone o ASF-infected nga lungsod kon wala nay bag-ong kaso nga mopatim-aw sulod sa 15 ka adlaw human sa kompirmasyon sa sakit niadtong Nobyembre 25.
Magpasalamat kita sa mga taga San Miguel kay sila na mismo ang mingtugyan sa ilang mga baboy nga ipapatay, matud ni San Miguel Mayor Ian Gil Mendez.
Sa ubang mga lugar, makig-away pa ang mga tag-iyahan sa baboy nga anaa sa delikado nga kahimtang nga makatakod nga sakit, nga magpalangan usab sa pagbuntog sa pagkuyanap sa sakit. (PIABohol)
