By PIA-Bohol | 09:16 AM January 22, 2025
Kon dagway og nagkalisud ang mga tinugyanan sa pagtuman sa Executive Order No 31, nga nagmandu sa mga tinugyanan sa paghimo og linawas nga inspection sa tanan nga mga sakyanan nga mosulod sa Bohol gikan sa gawas sa lalawigan, karon, gihatagan na kini og solusyon.
Mismo si Gobernador Erico Aristotle Aumentado ang nangusog aron makabaton ang Kagamhanang Probinsyal sa 9 ka mga German Shepherd nga iro nga gibansay sa pagsimhot sa mga bomba ug mga armas, mga illegal nga drugas ug mga karne nga ipayuhot sa Bohol.
Niadtong Lunes, Enero 20, gipadayag sa media ang 9 ka iro samtang gipakita ang kapasidad niini nga mosimhot sa illegal nga drugas nga gitago sa usa ka kahon.
Kahinumduman nga ang Executive Order No 31, series of 2023, gipadayag sa gobernadfor nga ang pagkatag sa illegal nga drugas nagpadayonnga naghulga sa Bohol bisan pa man sa mga paghago sa mga ahensya nga nagpatumans a balaod.
Matud ni Aumentado, base sa police intelligence reports, natumbok nga ang mga pasahero nga personal nga magbitbit sa illegal nga drugas o mga sakyanan nga gilabang gikan sa mga silingang isla ang giagi-an sa mga illegal nga payuhot.
Ug sumpay niini, usa ka lakang sa pagpugong sa pagkatag sa illegal nga drugas mao ang pagbutang og mga iro nga mosimhot sa mga bagahe, tawo ug mohimo sa inspeksyon sa mga sakyanan nga mosulod nganhi.
Kahinumduman usab nga niadtong Pebrero 14, 2023, pinaagi sa Executive Order No 4, series of 2023, nga nagtukod sa Canine Unit sa Buhatan sa Gobernador, tumong nga gawas sa pagsumpo sa illegal nga drugas, kini usab nga unit tahasan sa pagbuntog sa terorismo ug uban pang mga criminal nga kalihukan.
Nakit-an usab sa gobernador nga niining bag-o lamang, makatabang ang canine unit sa pagpugong nga makasulod sa Bohol ang mga karne nga kontaminado na sa African Swine Fever.
Nunot niini, matud sa gobernador nga ang 9 ka mga bag-ong iro, ideploy sa mga pantalan nga gihimong agi-anan sa roll-on, roll-off nga possible usb nga giagi-an sa mga illegal nga patigayon.
Dala usab niini, pugos na ang inspeksyon sa tanan nga motor vehicles, ilang mga drivers, pasahero ug kargamento nga mosulod sa Bohol segun sa Executive Order. (PIABohol)
