By Rey Anthony Chiu | 10:39 PM November 12, 2024
Ilegal nga drugas nga ebidensya sa 94 ka kaso nga gitaral sa pipila ka mga korte dinhi sa Bohol ang natala nga sunogon karong Huwebes, Nobyembre 14, 2024.
Kini maoy kasayuran nga gikan sa Philippine Drug Enforcement Agency Bohol, dili pa lamang dugay.
Didto sunogon ang kinatibuk-ang 1,969.5700 gramos nga illegal nga drugas nga may street value nga P13 milyones 393 mil ug 076.00 ka pesos sa kasamtangan nga bili na anaa sa P6,800 matag gramo niini.
Ang mga illegal nga drugas nga sunogon, dalhon sa Sugbo diin adunay pasilidad nga pwede nga sunogan, subay sa lagda sa balaod sa pagsunog niining nga drugas nga gipugngan nga makabalik sa kamot sa mga nagpayuhot niini.
Sukwahi sa pagtuo sa uban nga ang drugas nga masakmit sa mga tinugyanan, ibalik ra og pamaligya, gipasabut sa kapolisan nga kauban sa Department of Justice ug sa saksi nga mga barangay officials ug sakop sa media, kini dalhon human sa imbentaryo, ngadto sa labing duol nga PNP Crime laboratory alang sa kemikal testing.
Kon mapamatud-an nga ang nasakmit, illegal nga substance, kini tipigan sulod sa Crime laboratory, ug ikagawas lamang kon may mandu sa korte.
Ang korte usab makahimo sa pagsubay kon ang drugas nga gitipigan sa crime laboratory, anaa pa ba ug walay nausab sa kadaghanon niini.
Ug samtang nagpadayon ang paghusay sa kaso, kon ang drugas nga nasakmit, sobra sa gikinahanglan sa ebidensya, momandu na ang korte nga sunogon na ang sobra, samtang iapil na niini kadtong mga drugas nga napresentar na isip ebidensa sa nahuman na nga kaso.
Dihay mga higayon, matud pa sa kapolisan nga ang pagdispatsar sa drugas, ibubo sa inidoro, apan karon, subay sa balaod, kini kinahanglang sunogon gamit ang sobra nga kainit aron wala nay aso nga masimhot ug modayon na og katunaw ang drugas.
Nasayran nga wala pay pasilidad sa Bohol nga pwede magamit alang sa pagsunog dinhi, hinungdan nga ato himoon ang pagsunog didto sa Sugbo.
Segun sa Kampo Dagohoy, ang pagsunog adto himoon sa Cosmopolitan Funeral Homes, Junquera St., Cebu City, diin may crematorium alang niini. (RAHC/PIA-7/Bohol)
