By Ric Obedencio | 10:25 PM March 01, 2023
Ang kampo nila ni Congewsswoman Alexie B. Tutor ug Carmen Mayor Che Toribio delos Reyes nagkahiusa na basi sa ilang gipakita nga mga lihok ug gipamulong atol sa ika-154 nga kasumaran sa pagka-lungsod sa Carmen adlawng Miyerkules, Marso 1.
Bisan sa mga pagbanat sa kampanya, labina ni BM Nathaniel Binlod batok kaniya, si Tutor nagkanayon nga walay barangay ug lungsod nga mabiyaan sa iyang mga paningkamot. Pruweba niini, mao ang gigugol nga pundo alang sa kabarangayan sa Carmen nagkantida sa P93.5 milyones alang karong tuiga, si Tutor nagbutyag.
Siya midugang nga sa halos 20 minutos niya nga pakigpulong isip guest sa foundation day sa Carmen, ang panerbisyo sa gobiyerno ubos sa iyang pagka-Konesista walay pihig-pihig.
“Let us be together,” matud ni Tutor. Kinahanglan nga ang “loyalty” dili alang sa usa ka personahe, kon dili alang sa katawhan.
Si Tutor nagkanayon nga siya mibarog sa iyang pakigpulong nga siya wa’y “guilt” o sala kalabot sa mainit nga kampanya niadtong niaging tuig.
Ug gi-special mention niya si BM Nathaniel Binlod, ang usa sa mga sinaligan ni Delos Reyes sa Carmen, iyang gipakita nga gipasaylo si Binlod bisan wala kini niya gilitok. Gani, midayeg usab si Tutor ni Binlod tungod kay kini nagpakita sa iyang kakugi.
Kon kahinumduman, si gibombahan ni Binlod si Tutor nga bag-o pa na-Kongresista kinsa daghan na og beach resorts. Apan, si Tutor wala matandog niining banat ni Binlod atol sa kampanya sa 2022 nga piliay.
Sa interview sa media kaniya, si Binlod mibutyag nga wa siya’s sala.’ Apan, iyang giangkon nga sa panahon sa politika ug kampanya aduna gyu’y mga butang nga di kapugngan.
Sa iyang kabahin usab, si Mayor Delos Reyes mipadayag sa kalipay ug pasalamat sa nahimong panaghiusa sa duha ka mga kampo nila ni Tutor.
Matud niya wala siya magbaton sa pagdumot batok ni kinsa, kon pag-alagad lang sa katawhan. Ang pagserbisyo sa pubiko usa ka sakripisyo ug ang interest sa katawhan mao gyud ang iyang hatagan sa pagtagad.
Ang programa sa foundation sa Carmen gibuksan sa public plaza duol sa simbahan sa lungsod ug itambongan sa 29 ka mga barangay uban sa ilang mga “display” nga lagotmon ug prodkto sa uma ubos sa agri-fair.
Ang usa-ka-semana nga foundation day celebration maglusad sa unang Chocolate Hills festival, lakip ang street dancing sa umaabot Sabado, matud ni De los Reyes. (rvo)
