By PR | 11:05 PM May 25, 2024
Gibutyag sa Philippine Drug Enforcement Agency (PDEA) Bohol nga sobra na sa katunga sa mga barangay sa lalawigan sa Bohol ang gikatahu nga wala nay namonitor nga kalihukan sa illegal nga droga.
Atol sa gipahigayong The Capitol Reports niadtong Mayo 24 sa Kapitolyo, si agent Chona Egam sa PDEA Bohol mibutyag nga mokabat na sa 62% o anaa sa 672 ka mga barangay sa Bohol ang gideklara nga drug cleared.
Ang Bohol dunay 1,109 ka barangay diin mokabat pa ngadto sa 437 nga nagpabilin nga dunay problema sa iligal nga droga.
Gibutyag ni Egam nga dili sayon og daghang hagit ang pagpahigayon og drug clearing operation tungod kay daghan pa gihapon ang nalambigit sa iligal nga kalihukan.
Gani dako usab ang sakripisyo sa mga barangay opisyal nga maoy magpahigayon og monitoring kanunay aron ma deklara ang ilang barangay nga luwas na sa iligal nga droga.
Tuig 2016 pa sa panahon ni kanhi presidente Rodrigo Duterte dihang gisugdan ang drug clearing operation sa mga kabarangayan sa Bohol og tibook nasud.
Hinoon sa pagkakaron, base sa datos sa Bohol PNP sa tuig 2023 ug 2024 natala ang panakadaghan nga volume sa shabu nga nasakmit sa mga operatiba nga may kinatibuk-ang kantidad nga P99,419,128 base sa standard drug price.
Nagpasabot lamang kini nga ilawom sa administrasyon ni Gobernador Erico Aristotle Aumentado, gihugtan gayod ang kampanya batok sa iligal nga druga sanglit subay sa iyang strategic change agenda gilantaw nga masulbad ang maong suliran sa lalawigan. (PIMO/AT)
