By PR | 10:57 PM May 22, 2024
Dako ang kalipay sa duha ka mga lola human nakadawat og tabang alang sa ilang maintenance nga tambal gikan sa Office of the Vice-President – Bangsamoro Autonomous Region in Muslim Mindanao (BARMM).
Ang duha ka mga lola nga may pangidaron nga 86 ug 89 nidangop sa OVP aron mangayog tabang parehong nakakuha og Guarantee Letter (GL) gikan sa Medial and Burial (MAB) assistant program ni Bise-Presidente Sara Duterte.
Si Lola Ala, 89, may gibati nga CAD-LR o coronary disease, usa ka matang sa sakit sa kasingkasing. Samtang si Lola Ponciana Jamon, 86, nag-antus sa hypercholesterolemia o taas nga cholesterol.
Uban ang upat pa ka mga higala, nanimpalad si Lola Ala pag-adto sa OVP-BARMM Satellite Office sa pamasin nga makapangayo og tabang alang sa tagsa-tagsa nila ka maintenance. Silang lima nakaswerte nga nahatagan og GL.
Sa pikas bahin, si Lola Ponciana usa ka retiradong magtutudlo sa elementarya. Matud pa niya, “tungod sa kalisud sa kinabuhi,” di igo ang pension nga iyang madawat alang sa iyang maintenance.
Iyang gibutyag nga usa ka doctor sa Cotabato City Health Office ang nitambag kaniya nga modulo sa OVP aron matabangan siya sa iyang panginahanglan.
Inubanan sa iyang apo, nanimpalad siya uban ang panghinaut nga matagbo sa maong buhatan ang iyang panginahanglan.
“Nagpasalamat kog daku kang Bise-Presidente Sara Duterte sa tabang nga iyang gihatag kanako,” matud pa ni Lola Ponciana.
Dugang pa niya, daku kini niya nga utang kabubot-on sa Bise Presidente tungod kay nasayod siya nga kini maoy nakapataas sa iyang kinabuhi.
“Hinaut pa daghan pa nga sama kanako ang matabangan ning maong buhatan,” sumpay pa ni Lola Ponciana.
Sa laing kalambuan, nagpadangat si Bise-Presidente sa iyang mainiton nga pagtimbaya ngadto sa mga sundalo ug mga kawani sa Philippine Navy atol sa ika-126 nga kasaulogan sa pagkatukod niini.
“Akong dakung pagpasalamat sa inyong pagkamatinud-anon, paghigugma ug pagserbisyo sa mga Pilipino ug sa atong nasud,” matud pa ni Bise-Presidente Duterte.
