By Ric Obedencio | 10:49 PM August 02, 2022

Si Gobernador Aris Aumentado nagbutyag nga ang iyang pagsulti sa media interview nga iyang ipahunong ang mga biyahe sa mga sakyanang pangdagat sa Panglao ug iyang pasirad-an ang isla sa mga namaligya sa Virgin island sandbar.

Kini mitumaw human sa gikataho nga ‘overpriced’ ang mga pagkaon nga gibaligya sa ‘sandbar.’ Ang ‘overpriced’ nga mga pagkaon giingon nga order nga mikabat sa kapin sa P26,000.00 sa maong isla.

Gipasabot sa gobernador nga ang iyang pagsulti nga ipahunong ang mga biyahe sa mga bangka didto sa isla usa lang ka rekomendasyon ngadto sa Department of Environment and Natural Resources (DENR) ug sa ubang ahensyang hingtungdan.

Kon ipahunong man ugaling ang mga biyahe, dili ang tanang biyahe ngadto sa mga isla, kon dili kadto ra ang padulong sa Virgin island lang, ang gobernador nagkanayon.

Rekomendasyon usab ngadto sa pangagamhanan sa Panglao ang iyang buot ipasabot nga iyang ipasarado ang mga namaligya didto sa maong isla samtang hipnoon ang mga butang nga angayan himoon.

Matud ni Aumentado sa interview ganinang hapon nga kon ihunong man ugaling ang pagpamaligya, sa maong isla lang kini angay buhaton.

Ang iyang rekomendasyon gitumong aron mapanalipdan ang mga turista ug mga gagmayng magpapatigayon ug ubang nanginabuhi dihang dapita.

Iya usab nga gipasabot nga ang maong rekomendasyon adunay paga-agian, sama sa LGU sa Panglao ug sa Protected Area Management Board (PAMB) nga ubos sa supervision sa DENR.

Ang Virgin island usa ka ‘sandbar’ nga konektado sa isla sa Puntod na nahisakop sa Poblacion, Panglao, Bohol.

Matud ni Aumentado nga ang Panglao usa ka Protected area ubos sa Republic Act No. 11038 o Expanded-NIPAS Act, angayang panalipdan.

Ang pagpanalipod angayan buhaton tungod kay ang kalikopan mao usab ang kakuhaan sa panginabuhian, sama sa pangisda, sa mga katawhan sa Panglao.

Siya midugang nga andam aang iyang administrasyon sa pagtabang sa Panglao kon gikinahanglan. (rvo)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.