By Rey Anthony Chiu | 01:48 PM May 13, 2024
Di matugkad ang ka lawom sa gibati nga kalipay sa duha ka inahan: si Anecita Gaba ug Rosita Auel, pulos taga San Isidro, Bohol, kay, sa wa nila damha, gikatugyan sa adlaw sa mga Inahan (Mothers Day), ngadto sa ilang mga kamot ang balay nga ila na nga matawag nga ilang kaugalingon, nga dili na nila maiisip nga matukod gamit ang ilang kaugalingong kinitaan.
Ang gugma sa usa ka unahan usab, maoy nagsugo ni Kongresista Vanvan Aumentado, Gob. Erico Aristotle Aumentado, mga kapolisan, mga kabomberohan, ug mga sakop sa Alpha Kappa Rho nga magtinabangay aron pundohan sa ilang personal nga salapi, kahagu ug pasensya ang ika 17 ug 18 nga desente nga balay ilawom sa PNP Libreng Alagad ug Balay (LAB) ug Balay sa Paglaum sa mga Aumentado.
Halos manaligdig na ang luha ni Aniceta, samtang tak-um ang baba ni Rosita, apan saghid sa kasingkasing ang kamatinud-anon sa ilang mga pasalamat sa Project LAB ug Balay sa Paglaum.
Tinuod, Kongresista ako sa ikaduhang Distrito apan isip asawa sa gobernador, inahan usab ako sa tibuok lalawigan sa Bohol, ug nabati ko ang mga kasakit sa mga inahan nga naglantaw sa kaayohan sa ilang mga anak, sulti pa ni Cong VanVan Aumentado.
Diha nga gipahigayon ang ceremonial turn-over sa ilang mga balay, si Reynalo nga bana ni Rosita, ug si Reyvio nga bana ni Anecita, parehas nga mi-ingon nga kini na ang labing daku nga dayag nga gasa sa Mother’s Day nga ilang nahatag sa ilang mga asawa.
Nagkugi ug nagpak-ulipon ang duha ka mga responsible nga bana, sa pagtabang sa pagpanday, aron may ikatampo sila sa usa ilang madawat nga Libreng balay nga mao na unyay saag sa ilang banay.
Sa Sitio Cangharang, Poblacion San Isidro didto gipabarug sa yuta sa iyang asawa ang balay nga puy an na nila ni Reynalo, Rosita ug ilang 15 anyos nga anak nga si Ritchie.
Didto usab sa Sitio Cabasaan, Cansague Norte, San Isidro ang kang Reyvio ug Anecita Gaba, kauban sa ilang anak nga si Rinalyn, Grade 4.
Matud sa mga Aumentado, dugay ra nila nga pangandoy nga makahimo sa ingon niini nga proyekto, apan wala sila’y nakit-ang nga kasaligan nga dili isipon sa mga tawo nga pamolitika ra nga buhat ang ilang tabang.
Ang paglutaw sa LAB sa kapolisan pinangulohan ni Col Lorenzo Batuan, ug may inspirasyon sa programa sa Diyosesis nga Libreng pabalay, nagtanyag sa mga Aumentado sa kahigayunan nga ipamatuod na ang ilang dugay nga gidamgo nga buhat sa kalooy.
“Dako kita og pasalamat nila ni Gob Aris ug Cong Vanvan, kay kon wala nila kami abagi, mga 5 ngadto sa 6 pa kabala yang atong mahimo kay ang pundo niini, nagsalig ra usab sa mga tabang gikan sa mga may maayong kabubot-on, mga negosyante nga amigop sa pulis ug mga yanong donasyon sa inyong kapulisan,” pasabut ni Police Lieutenant Col Norman Nuez, hepe sa Police Community Affairs and Development Unit sa Kampo Dagohoy.
SI Reynalo, mangagsa ug tigpanaka og lubi koprason, ug nai-ipon og puyo sa balay sa iyang ugangan, apan kini nahugno sa bagyong Odette.
Human sila maluwas pinaagi sa paghiklin sa duol nga dangkahan, namunit si Reynaldo sa mga guba ug nagtukod og kamalig nga luoy ang kahimtang.
Sa laing bahin, Si Reyvio nga taga Mindoro, nadagit sa iyang asawa nga si Anecita, kinsa human sa 36 ka tuig nga nanarbaho sa Manila, giganoy sa ka mingaw uli sa San Isidro.
Usa ka kamalig nga ginama sa mga bidlas ang ilang gipuy an, ug kini ang abtanan permi sa mga sakop sa kapolisan nga manggipatrolya.
Law abiding Boholanos (LAB) ug Lumolupyo nga Abin sa Balaod (LAB), maoy atong unang basehan sa pagpili sa nga mahatagan sa Libreng balay, matud pa ni Police Lieutenant Cirlito Curayag, hepe sa kapolisan sa San Isidro.
Didto mismo sa pagtugyan sa mga balay si Cong Van an, Gob Aris, PD Batuan, LtCol Norman Nuez, Mayor Dods Gementiza, mga taga Bureau of Fire Protection, mga taga AKRHO, Kapitana Esterlita Astronomo, mga opisyales sa barangay, BHW ug mga Nutrition scholars ug mga kapolisan ug sakop sa AFP Caa Detachment sa Cambansag.
“Nagpasalamat ako sa among aktibo nga partnership sa BPPO, pinanguluhan ni PD Lorenzo A. Batuan kay pinaagi sa ilang programa nga Libreng Alagad ug Balay, nahatagan og katumanan ang among damgo ni Cong. Vanvan Aumentado, pagtabang sa nagkinahanglan og panimalay pinaagi sa among personal nga pondo,” dayag pa ni Gob Aris Aumentado. (PIABohol)
KAMALIG NGA SIN. Gikan sa mga pinunit nga sin nga guba gikan sa atup sa balay sa iyang ugangan, gipabarug ni Reynaldo Atuel, taga Tapon Ubay, ang kamalig nga ilang kapuy-an. Gikan sa pagkamananagat, nadawi si Reynaldo ni Rosita nganhi sa bukid, diin iyang gipahaum na usab ang iyang kinabuhi ug nanginabuhi nga mangagsa og lubi koprason. Sa ilang pagka manggisunoron sa balaod (law abiding Boholanos), napili sila sa PNP San isidro nga makabenepisyo sa Libre nga Alagad ug Balay (LAB) uban usab sa Balay sa Paglaum sa mga Aumentado. (PIABohol)
)
