By PR | 11:42 PM April 18, 2024
Kusganon nga gikondena sa Department of Education (DepEd) ang pagpusil-patay sa usa ka magtutudlo sa Mahayag, Zamboanga del Sur.
Gikondena sa DepEd ang pagpatay kang Jerome Etorma, 36, magtutudlo sa Dumingag National High School gipusil-patay sa wa pa mailhi nga mamumuno ginamit ang kalibre .45 nga pistola sa iyang paghidangat sa Barangay Boniao sa lungsod sa Mahayag mga 5 sa hapon niadtong Abril 11.
Sa pamahayag nga pinetsahan og Abril 13, gipadangat sa DepEd ang pagpasubo ngadto sa nagbangutan nga banay ug mga kauban sa trabaho sa biktima.
Giawhag sa DepEd ang mga otoridad nga dugangan ang paningkamot aron sigurohon nga luwas ang mga magtutudlo ug mga komunidad.
Gihangyo usab niini ang kapulisan nga madali ang pagsikop sa mga naghimo sa salaod ug pagtaral kanila ngadto sa hustisya.
Nagpadayon pa ang imbestigasyon sa krimen aron pagsuta kon unsa ang mga posibleng motibo niini.
Matud pa sa mga kabanay ug kauban sa trabaho sa biktima, wa silay nailhan nga nakaaway niini.
Si Maj. Renante Benitez, hepe sa Mahayag Municipal Police Station, nakatutok ang ilang imbestigasyon sa usa ka tawo nga giila isip “person of interest” kinsa posible nga dunay kalabutan sa krimen.
Ang pagpusil-patay nahitabo samtang nigawas ang resulta sa survey nga gihimo sa Tugon ng Masa nga nagpakita nga ang DepEd ubos ni Bise-Presidente Sara Duterte maoy labing gisaligan ug maoy nag-una sa serbisyo sa mga ahensya sa kagamhanan.
Kini samtang si Bise-Presidente Duterte usab nagpabiling gisaligan ug gikauyonan sa tanang opisyal sa kagamhanan karon.
Matud pa sa survey nga gihimo niadtong Marso 11-14, 82% sa mga gipangutana nagpadayag sa ilang pagsalig sa DepEd.
Ang pagsalig sa DepEd kinatas-an sa Mindanao diin nakakuha kining pag-uyon sa 94% sa mga respondents sa survey.
Ang 84% sa DepEd mao usay kinatas-an og grado sa mga ahensya sa kagamhanan sa first quarter ning tuig 2024.
