By PR | 07:39 PM March 20, 2024
Gipahigayon ang blessing ceremony Cong. Natalio P. Castillo Sr. Memorial Hospital (CNPCSMH) Marso 19 diin ipadayag ni Gobernador Erico Aristotle Aumentado ang kalipay nga masugdan na niini ang serbisyo sa katawhan sa lungsod sa Loon.
Matud pa sa gobernador nga bisan pa sa mga kakulian, miabot na ang panahon nga mapahimuslan sa mga Loonanon ang dugay na nga gipaabot nga moalagad kanila ang maong tambalanan.
Lakip sa mga kadagkoan sa maong hospital nga mitambong sa maong kalihukan mao si Dr. Ma. Cyrilda B. Tallo, hepe sa hospital, uban ni Duvelaine Tan, administrative division head ingon man mga opisyales sa lungsod nga gipanguluhan ni Mayor Elvi Relampagos.
Gawas ni Aumentado, gitambungan usab kini sa Local Finance Committee (LFC) sa kagamhanang probinsyal pinanguholan ni provincial administrator Asteria Caberte ingon man ni Canhangdon Occidental punong barangay Winston Pagaura.
Si Aumentado nagkanayon nga sa iyang kapasidad isip gobernador, dili siya makatugot nga mausik ang buhis sa katawhan gumikan sa proyekto nga wala mahuman.
Giangkon niini nga halos makabsan sya sa pailob sa mga contractors apan mapasalamaton sya sa ilang pagsanong sa iyang hangyo nga tiwason gayod kini.
Mokabat sa 16 ka contractors ang nalambigit sa maong proyekto gumikan sa daghang mga kakuwangan niini bisan pa man sa gipahimutang nga pondo alang sa maong hospital.
Ang mga contractors mao ang MEDIKOTEK Inc., C. Jansen Construction, Inabanga Drilling Construction Steel Fab and General Merchandise, G- Rhino Construction, A and D Construction, Firmax Construction, Chem-Earth Technologies Incorporated, Maconark Builders Inc., Gerson Construction and Hardware, Jeck Construction, Nodal Electric Trade and Services, Eyma It Works Solutions Inc., DBP Constructions, Wynn Constructions, ug A. A. De Vera Construction.
Pinaagi sa komedya, si Caberte mitanyag sa kamot sa pagpakighigala ngadto sa mga hingtungdan nga nakatilaw sa iyang hait nga sinultihan aron lang matukmod ngadto sa pagtiwas ang ospital.
Matud pa, ang gikabalak-an sa kapitolyo nga magabok lang unya ang mga materyales og dili na hinuon magamit.
Si Dr. Cesar Tomas Lopez, mayor sa Loon sulod sa tulo ka termino ug karon nag-alagad sa Provincial Health Office, nagpasalamat sa gobernador sa pagpakabana ug pagtutok nga tapuson gayud ang trabaho sa maong hospital.
Matud ni Aumentado, dili makaingon ang Bohol nga malamboon kung ang mga konstituwente niini masakiton.
Alang kang Aumentado, magkuyog ang kalambuan sa probinsya ug himsog sa katawhan.
Kini ang hinungdan nga pursigido ang gobernador nga makabaton gayod og maayo nga ospital ang Loon human kini gikuso-kuso sa linog ang kanhi anindot nga ospital 11 na ka tuig ang nakalabay.
“We cannot deliver good services if we don’t have a good facility. This is the facility nga gipaabot sa katawhan sa loon,” sumala pa sa gobernador.
Sa laing bahin, gipadangat ni Aumentado ngadto sa mga namunuan sa lungsod ug sa ospital ang hagit sa paghatag og maayo nga serbisyo ngadto sa katawhan ug paspasan ang pagpangandam ilabina ang pagbaton sa license to operate.
Sa nakalabay nga mga buwan, nagpahigayon og assessment ang Department of Health (DOH)nRegion 7.
Matud pa nga ang bag-o nga ospital dili makagamit sa license to operate gikan sa karaan nga ospital gumikan kay ang address niini sa barangay Basac, samtang ang bag-o anaa mahimutang sa Canhangdon Occidental mao nga dili kini aprobado sa DOH.
Gikinahanglan una nga ma-assess usab sa DOH region ang bag-ong ospital aron makabaton og license to operate.
Si Tan nagkanayon nga kini ang hinungdan nga gipahigayon ang blessing ceremony aron pormal nga ibalhin ang tanang mga kahimanan sa daan nga hospital ngadto sa bag-o nga pasilidad.
Kung mapahimutang na ang tanan, subli nga magpahigayon ang DOH Region.
Ang license to operate senyales nga makahimo na pagsugod sa operasyon ang bag-ong CNPCSMH. ALT/PIMO
