By Rey Anthony Chiu | 09:24 PM February 28, 2024
Pagkaugma dayun human sa enkwentro nga nahitabo sa sitio Camucom, Malinao 2, Campagao Bilar Bohol, gipadala dayun ni Gobernador Aris Aumentado ang multi-agency nga fact finding mission didto sa lugar aron subayon kon may mga kalapasan ba sa mga gilagdaan nga mga kasabutan tali sa managbingkil na bahan subay sa pagtamud sa tawhanong katungod.
Pinaagi sa gahum sa Provincial Peace and Order Council (PPOC) gipadala sa gobernador ang Fact Finding Mission Team (FFMT) aron sutaon kon may paglapas ba sa Comprehensive Agreement on the Respect for Human Rights and the International Humanitarian Law (CARHRIHL), segun sa kasabutan sa kagamhanan sa Pilipinas ug sa Communist Party of the Philippines-New People’s Army-National Democratic Front (CPP-NPA-NDF) sa nagpadayun nga kagubot.
Ang PPOC FFM Team gipangulohan ni Romeo Teruel, PPOC Bohol ELCAC Coordinator, Jonathan Tibay, Officer In Charge sa Commission on Human Rights, Jerome Gonzales, DILG Provincial Director, Rey Anthony Chiu (PIA Bohol) Carmelita Tecson Provincial Social Welfare and Development, Jane Fabio sa Department of Social Welfare and Development, DILG Elcac Focal Person Roy Vincent Gaviola, Caye Lumaad (OPSWDO), Benjamin Villeno (Provincial Cooperative Development Office), Mary Cris Vazquez (DSWD), Maria Berlin Algusar (OPSWDO) Lenie Grace Bendo (OPSWD) ug abogado sa Provincial Legal Office, Atty. Rene Vallentos.
Didto sa lugar, gikahinabi sa bahan ang mismong tag-iya sa balay nga giembudohan sa mga armado nga tawo, ang iyang anak ug silingan, mga silingan, mga sakop sa kapolisan nga minghimo sa pagtunol sa arrest warrant, mga pulis nga minghimo sa pag assault, scene of the crime operatives (SOCO), Commanding Officer sa 47IB ug mga natumbok nga apektado sa gira.
Buot sa gobernador mahibaw-an ang kamatuoran sa gipasangil nga massacre, nga mingsurrender na, nga may nakaipsot pang kauban, nga dili si Kumander Compoc ang gihaya ug nga unsa ang ikapasalig sa goberno nga tabang sa mga apektado sa kalisang dala sa gubat.
Ang bahan nga naghimo sa mga imbestigasyon, gipaabut usab nga moduso sa ilang tagsatagsa ka mga obserbasyon ngadto sa gobernador, aron mahipno na ang pagpagawas sa kasayuran ug kamatuoran kabahin sa mga isyu nga wala pa matubag.
Matud pa, ang resulta sa FFM, mao usab ang ipresentar sa mga tinugyanan karong mosunod nga mga adlaw. (PIABohol)
