By BMJAV MAO | 12:07 PM August 23, 2022
Pinaagi kang Board Member Jamie Aumentado Villamor, gihatag ang usa ka rubber boat ug ubang safety gears ngadto sa buhatan sa National Irrigation Administration (NIA) sa Calanggaman, Ubay, Bohol kahapon, Agosto 22.
Kini malipayong gidawat sa buhatan sa NIA nga gipanguluhan sa Acting Regional Director NIA Region VII Engr. Reyne B. Ugay og Acting Head – Bohol Integrated Irrigation System Engr. Evelina P. Putong.
Ang maong rubber boat ug mga safety gears para kini sa paggamit ug sa proteksyon sa atong mga maintenance team sa pagpanghinlo sa Capayas Dam.
Matud pa ni Villamor, usa lang kini sa mga lakang ug sinugdanan pa lamang aron ipakita ang iyang pagpangga ug pagmahal sa mga mag-uuma sa lalawigan sa Bohol.
Iyang paningkamutan nga matagaan pa og dugang mga rubber boats ingon man sa uban pang mga safety gears ang mga nagdumala sa maong mga dam nga anaa diri sa probinsya sa Bohol.
Gipanguluhan ni Villamor ang komitiba sa Trade and Industry ug ang Natural Resources and Environmental Protection sa Sangguniang Panlalawigan dinhi sa lalawigan sa Bohol.
