By Rey Anthony Chiu | 08:58 PM February 22, 2024
Ang mas hinay nga tinuig nga pagsaka sa presyo sa abangan sa mga sak-anan, bayranan sa tubig, korente ug gaslolina nakatampo sa paghinay sa sulbong sa presyo sa Bohol ngadto na sa 3.7% gikan sa taas nga 10.3% nga namatikdan sa Philipine Statistics Authority (PSA) sa pagtandi sa buwan sa Enero 2023 ug sa Enero niining tuiga.
Matud ni PSA Bohol chief statistician Jessamyne Anne Alcazaren, gikan sa 10.3% niadtong Enero 2023, medyo mihinay ang di unta mapugngan nga pagsulbong sa presyo (inflation rate) dinhi sa Bohol ngadto na sa 3.7%, ug gani namatikdan nga mas hinay na kini kay sa 5.2% nga natala sa PSA niadtong Disyembre 2023.
Sa laktod nga pagkasulti, ang inflation rate, mao ang pagtaas sa presyo, nga makapa-ubos usab sa balor sa kwarta sa lanat sa panahon. Ang rate sap ag-ubos sa bili sa kwarta sa lanat sa panahon masubay sa average nga pagtaas sa presyo sa susama nga usa ka basket nga pinalit o hugpong nga serbisyo sa dagan sa panahon.
Nakatampo usab sa pagtiglum sa inflation rate ang hinay nga us-os sa presyo sa pagkaon ug ilimnong makahubog nga ming sadsad sa 7.2% niining Enero 2024, gikan sa 7.7% sa Disyembre 2023, segun pa sa PSA.
Kon itandi sa presyo sa pagkaon sa 2024, ang presyo sa pagkaon may inflation rate nga anaa sa 7.5% niining Enero 2024, samtang namatikdan sa PSA ang susamang dagan sa presyo niadtong Enero 2023 nga may 9.6% inflation rate.
Kon itandi sa nasudnon nga inflation rate, mas taas pa hinuon ang presyo sa susamang produkto dinhi sa Bohol sa 0.9% kon itandi sa nasud, nga naa na sa 2.8% sa Enero 2024 gikan usab sa mas ubos pa sa Bohol nga inflation rate niadtong Enero 2023 sa 8.7%.
Sa Central Visayas, mas taas gihapon og dyutay ang inflation rate sa Bohol kay ang kinatibuk-an nga rehiyon, kay napakanaug ang inflation rate dinhi ngadto sa 2.5% niining Enero 2024, gikan sa 3.9% sa Disyembre 2023 ug 7.7.2% sa Enero 2023.
Ang natala nga mga datus niining Pebrero 2024, gibase na sa gisibug nga consumer price index sa tanang bubong sa kabalayan ngadto na sa base year 2018, gikan sa base year 2012 . (rahc/PIA-7/Bohol)
