By PR | 11:10 PM October 12, 2023
Si Gobernador Aris Aumentado nagpadayag sa suporta ngadto sa 2022 Census for Agriculture and Fisheries (CAF) nga pagabuhaton sa mga lalawigan.
Gipadayag sa gobernador ang iyang suporta atol sa gihimong courtesy call ni Chief Statistical Specialist Jessamyn Ann Alcazaren sa Philippine Statistics Office (PSO) niadtong Oktubre 9 sa iyang buhatan.
Uban kang Alcazaren sa maong pagduaw sila si Blecila Paredes, Emmanuel Galab, Venus Gloria ug Fiel Rose Tac-an, mga statistical assistànts sa PSO Bohol.
Si Alcazaren nipahibalo sa gobernador nga ang PSA-Bohol kasamtangan nga nagpahigayon sa enumeration sa mga households ug kabarangayan sa tibuok lalawigan subay sa Executive Order No.352 series of 1996.
Gisugdan kini niadtong Septyembre 4 og tumong nga tapuson sa Oktubre 25.
Sa Hulyo 2024, gilauman nga abri na ngadto sa publiko ang mga kasayuran kabahin niini.
Matod pa, ginapahigayon kini kausa matag napulo ka tuig, paghipos og mga impormasyon kabahin sa sektor sa agrikultura ug sa mga mananagat.
Nipadangat sa iyang suporta ug pasalamat si Aumentado ngadto sa PSA-Bohol sa maong kalamboan tungod kay gikinahanglan usab sa iyang buhatan ang lab-as nga mga impormasyon alang sa policy making ug pagpauswag sa kahimtang sa sektor sa pagpanagat ug agrikultura.
Dugang pa ni Aumentdo, aktibo ang Bohol Price Monitoring Council pagsubay sa presyo sa palaliton ug sa inflation rates aron masolusyonan ang mga hagit sa lakaw sa ekonomiya.
Gipahibalo sa PSA ang umaabot nga implementasyon sa Community Based Monitoring System tibuok nasud nga pondohan sa Department of Social Welfare and Development.
Gidapit usab sa PSA-Bohol si Aumentado alang sa 3rd Provincial Product Accounts (PPA) sa Nobyembre 29. Atol sa maong kalihukan, masayran ang nakalabay nga Economic Performance sa Bohol.
Positibo nga gidawat ni Aumentado ang maong mga katikaran, ug matod pa niini, ang iyang usa ka tuig nga panerbisyo isip gobernador tumong pagpapas sa branding nga “mahal ang Bohol”.
Kusganon ang gobernador sa pagpatuman sa mga lakang nga iyang giila nga makatabang sa maong katuyuan sama sa pag-imbita og mga dagkong mamumuhunan pinaagi sa pagsulod sa Puregold, SM ug uban pa.
Apil niini ang pagpadaghan sa supply sa isda pinaagi sa tabang sa BFAR National Mariculture Center.
Sa pagkakaron, gitutukan usab ni Aumentado ang rice production ug ang vegetable production.
Sa laing bahin, gikumusta ni Aumentado ang bahin sa ID gikan sa PSA ug ngano nga ang uban wala pa makadawat niini.
Gipangutana usab niya kon nganong dunay mga establisemento dili man muila sa legalidad sa maong ID.
Tubag sa taga PSA nga nagpadangat na ang ilang buhatan og communications sa mga ahensya nga kinahanglan nilang ilhon ang Phil ID.
Alang usab sa mga nagpa-ID apan wala pa makadawat niini, mahimo nga mangayo og temporaryo nga ID sa buhatan sa PSA. (PIMO/ALT)
