By Helen Castaño | 09:35 PM February 13, 2024
“Pulos man to bakak,” mako kini ang paghulagway ni Gobernador Aris Aumentado sa mga alegasyon nga gilabay ni Ronie Orillosa batok kaniya ug sa Kapitolyo.
“Para lang adunay siya mahimo nga issue. Iyang hinganlan niya kinsa ang nang mga little governors,” matod ni Aumentado sa gihapahigayon nga press conference sa karung adlaw nga Martes, Feb. 13.
Matud ni Orillosa adunay 7 ka tawo sa Kapitolyo nga “little governors” ug sagaran kanila nangwarta ilabina sa mga negosyante nga musud sa Bohol. Sa iyang press conference kagahapon, Feb. 12, gitambungan kini ni Noris Oculam.
Giklaro ni Aumentado nga aduna syay executive management team nga maoy mopatuman sa iyang Strategic Change Agenda nga maoy timon sa iyang administrasyon.
Mipasangil si Orillosa walay direksyun ang administrasyon ni Aumentado.
Matud ni Aumentado nga adunay direskyun ang iyang administrasyun.
Giangkon ni Aumentado nga adunay “little governors” isip nagdumala sa opisina pero ang katapusan nga desisyon nagagikan gayud kaniya.
Gihagit ni Aumentado si Orillosa nga muadto sa Kapitolyo aron masayod sa direksyon sa iyang administrasyon.
Giklaro ni Aumentado nga wala makigkita niya si Orillosa para ipahayag ang iyang mga yangungo sama sa droga ug kamahal nga presyo sa palitunon sa probinsya.
“Dili sab mi close ana niya. Sa giingon niya nga suod mi nga higala dili na tinuod,” matud ni Aumentado.
Bisan pa man niana, punto por punto nga gitubag sa gobernador ang tanan nga mga pangutana diha kaniya.
Usa ka hagit ang gipadangat ni Aumentado kang Orillosa nga hinganlan ang giakusahan niini nga nahilambigit sa korapsyon kay dili siya magpanuko pagpaimbestigar ug pagpapriso kung kini mapamatud-an nga sad-an sa akusasyon.
Gipahinumdum sa gobernador nga ang Office of Governance Accountability Responsibility dili lamang alang sa kanhi administrasyon, apan apil niini ang pagsubay sa mga kagawian sa nanerbisyo sa kasamtangan nga administrasyon, ilabina sa isyu bahin sa iligal nga sugal, droga, korapsyon ug mga walhong grupo.
Gitaho niini nga ang isyu nga mitumaw bahin sa mga expired ug overpriced nga tambal kasamtangan nga anaa na sa buhatan sa COA ug OGAR ang imbestigasyon.
Kini ang hulagway sa iyang direksyon nga limpyong panggobyerno. Matud sa gobernador nga mikabat sa kapin sa 60 ka mga New People’s Army ang misurender ngadto sa pangagamhanan gumikan sa ilang pagsalig kaniya.
Gipamatud-an ang kumpyansa sa katawhan ngadto sa Bohol, pinaagi sa mga pasidungog nga nadawat sa Bohol isip ikaduhang pinakaluwas nga probinsya sa tibuok nasod.
Kabahin sa political will, gibida sa gobernador ang mga kalamboan bahin sa sustainable tourism, climate-smart agriculture ug environmental sustainability sa diha nga gihisgutan niini ang iyang lakang pagpaundang sa abuso nga pagpahimulos sa Virgin Island, pagpasira sa pipila ka mga operasyon sa quarry nga miabuso na sa kalikopan, pagpabarog og mga bagsakan centers sa mga utanon ug lagutmon ug mga highland vegetables, sa Panglao ug uban pa nga lungsod, aron pagpahiluna og market o komprador ngadto sa mga mag-uuma.
Apil niini ang pagsuporta sa mga ginaduso nga nagkadaiyang maayo nga paagi sa pagpanguma sama sa aquaponics, ang pagduso sa hangyo ngadto sa mga local government units nga ipaubos ngadto sa 10 ka kilometro ang mahimo nga kapanagatan apan pag indorso og mga paagi nga pakusgan ang pag-atiman sa usab sa kadagatan.
Gitubag usab sa gobernador pinaagi sa mga agenda sa kagamhanan sama sa ICT, human capital/workforce, entrepreneurship, infrastructure and utilities ug health and social services aron pagpasundayag sa iyang ginapeparahan karon nga pagsulod sa dako nga healthcare BPO kompanya nga Sagility.
Ang Sagility nagtanyag og 3,000 ka mga trabahante nga mahatagan og trabaho; ang kasamtangan nga pagsugod na sa pagpakural sa SM sa dapit nga tukuran sa ilang negosyo; ang pagsugod na sa konstruksyon sa Puregold; ug ang gikatakda nga pagpahimutang sa Air Asia Hub sa Bohol Panglao International Airport.
Ang nagkadaghan nga international flights sa Bohol usa sa nagpakusog sa tourist arrivals nga mikabat na og usa ka milyon kapin sa tuig 2023.
Sa hilisgutan bahin sa presyo sa isda gipasabot sa gobernador nga dili sa tanang higayon ug dili sa tanang dapit ang pagsaka sa presyo sa isda gumikan mahitabo kini kung dautan ang panahon. Ug ang paglihok sa presyo sa paliton nag-agad sa lakaw sa kalibutanong ekonomiya.
Bisan pa man niana, wala muundang sa pagtuon ang mga tinugyanan sa gobernador kung unsa pa ang pwede nga buhaton pagsumpo ning perennial nga suliran.
Tungod niini, bag-uhay lang nagpakanaog si Aumentado og Memorandum Circular No. 1 series 2024 sa pagpaaktibo sa Local Price Coordinating Council sa kalungsuran.
Pinaagi sa pag-umol sa Municipal Price Coordinating Council, maghatag kini og gahom sa matag local government nga pangusgan ang pagbantay sa presyo sa tanang nag-unang palaliton.
Gikatakda ang opisyal nga pagpalig-on sa maong balaodnon pinaagi sa panagtapok sa tanang mga hingtungdan nga sektor, ahensya ug opisyales sa Pebrero 15.
Sa katapusan gipadayag usab sa gobernador ang pagpadayon sa Governor’s Cup nga gisugdan sa miaging tuig. Giawhag sa Gobernador ang pagtinabangay aron mas paspas ang kalamboan. With a report from ALT/PIMO
