By PR | 03:06 PM January 05, 2023
Bukas na sa publiko ang mas gipanindot nga public market sa Anda human gipahigayon ang turn-over ceremony niini niadtong Huwebes, Enero 4.
Ang pagsubo sa bag-ong merkado gipanguluhan ni Gobernador Erico Aristotle Aumentado ug Mayor Angelina Simacio.
Niduyog usab sa maong turn-over ceremony sila si Bise Mayor Nilo Bersabal, Bokal Nathan Binlod sa ikatulong distrito, Rey Caseñas, ang representante ni Congresswoman Alexie Tutor ug mga kapitanes ug mga opisyales sa lungsod sa Anda.
Ang proyekto nga expansion and rehabilitation sa Anda Public Market naglangkob sa duha ka managlahi nga edepisyo diin ang usa dunay unom ka stall alang sa mga manindahay og dry goods.
Gitapos kini sa DMAM Construction Service sulod sa 138 ka adlaw, mas mubo kaysa gitakda nga 150 calendar days. Nagkantidad ang proyekto og P10 milyones sa pondo gikan sa panudlanan sa kagamhanang probinsyal.
Paghuman sa ribbon cutting ug blessing, nipaingon sa Quinale Beach ang mga opisyales alang sa pormal nga turn-over ug short program.
Si Aumentado nagkanayon nga ang maong proyekto kabahin sa strategic agenda aron pauswagon ang turismo ug agrikultura sa Bohol.
Dugang ni Aumentado, ang Anda umaabot nga tourist attraction tungod sa pinasahe nga kaanindot niini.
Samtang nagdasok na ang mga turista didto sa Panglao, usa kini ka alternatibo nga destinasyon sa tersero distrito partikular sa Anda.
Samtang, giturned-over usab ang mga ayuda gikan sa kagamhanang probinsyal sa Quinale Beach, lungsod sa Anda niadtong Enero 4.
Lakip sa mga proyekto nga gipundohan sa lalawigan ang pagtiwas sa Barangay Multi-purpose Hall sa Poblacion sa kantidad nga P500,000 gikan sa Governor’s Office; Socio-cultural Activities sa Barangay Suba nga gipundohan og P65,000 gikan ni Bise Gobernador Dionisio Victor Balite, Bokal Tita Baja, Nathaniel Binlod ug Gloria Gementiza; socio-cultural activities for alang sa Barangay Foundation Day sa Badiang sa P80,000 gikan sa pondo ni Balite, Baja, Binlod ug Bokal Greg Jala.
Laing gipundohan usab ang 58th Foundation Day sa Barangay Katipunan sa kantidad nga P105,000 gikan ni Balite, Baja, Jala, Binlod, Gementiza ug sa Sangguniang Kabataan provincial federation ug 1st Foundation Day Celebration sa Barangay Talisay sa kantidad nga P95,000 gikan ni Balite, Baja, Binlod, Gementiza ug Romulo Cepedoza sa Liga ng mga Barangay.
Gipahinumduman usab ni Aumentado ang mga kapitan nga andamon ang resolusyon alang sa tag P200,000 alang sa ilang barangay nga ginapanghatag sa iyang buhatan.
