By PR | 08:55 AM December 30, 2023
Makahuloganon ang kasaulogan sa adlawng natawhan ni Gobernador Erico Aristotle Aumentado ngadto sa mga molupyo sa isla Tintinan, Ubay diin gipahigayon ang usa ka island outreach.
Malampuson nga gipahigayon nga maong outreach Tintinan nga gipahigayon sa Tintinan covered court Disyembre 29 sa pagsaulog sa ika-46 nga tuig sa gobernador.
Pinangulohan sa mga sakop sa Medical Outreach Unit (MOU), ang maong outreach inubanan sa Special Projects Section (SPS) ug sa ubang mga kawani sa Governor’s Office (GO) sa pagpahimutang sa medical mission.
Nikabat sa 185 ka mga bubong ang libreng nakapahiling sa ilang panlawas uban ang ilang mga kapamilya pinaagi sa doktor gikan sa kagamhanang probinsyal.
Duna usay mga bitamina ug mga tambal nga gipanghatag sa tanan nga nagkapakonsulta.
Gawas pa niini, 20 usab ka mga residente ang nahatagan og serbisyong dental.
Sa laing bahin, sinako nga bugas ang gipahimutang sa Office of the Social Welfare and Development (OPSWD) ang giapod-apod ngadto sa 246 ka pamilya diin nikabat sa tag 10 ka kilo ang nadawat sa matag benepisyaryo.
Mokabat sa 183 ka mga school bags ang gipahiluna sa Education Development Center ( EDC) aron ipanghatag ngadto sa mga kabataan uban sa pagtambayayong sa Tintinan Elementary School.
Libreng palugaw ang gidalit sa kapitolyo alang sa tanang residente nga giparisan sa 1,000 ka mga nutri bun gikan sa buhatan ni Senador Imee Marcos.
Naghugyaw ang kabataan sa mga padula nga gipasiugdahan sa kapitolyo diin gihatagan usab ang tanang kabataan og mga premyo.
Laing gasa usab ang mga bag-ong bisting pinutos (clothing) bag-ong gikan ni Gobernador Aumentado ug Congresswoman Vanessa Aumentado.
Nahimong mas mabulukon ang kasaulogan uban sa mainiton nga pagtimbaya sa mga islahanon ngadto sa gobernador pinanguluhan ni Kapitana Victoriana Alacida.
Natandog ang kasingkasing ni Aumentado sa mga pagtimbaya gikan sa mga kabataan ug tanang mga lumulupyo ug nakahilak kini sa kalipay.
Gipadangat sa Gobernador sa iyang dako nga pasalamat sa ilang gugma ngadto sa mga Aumentado.
Natapos ang kalihukan nga nagsadya ang tanan ug nagbalon sa daghang kaayuhan ang mga residente sa ilang pagpauli.
Ang mga empleyado sa kapitolyo malipayon usab nga nakabalik sa dakbayan sa Tagbilaran. (PIMO/ALT)
