By PR | 12:10 PM December 06, 2023
Gipahugtan karon sa lokal nga kapulisan ang pagbantay sa kahusay ug kalinaw human sa nahitabong pagpamomba sud sa Mindanao State University sa Marawi City niadtong adlawng Domingo.
Matud pa ni Police Lt.Col. Norman Nuez, tigpamaba sa Bohol Police Provincial Office (BPPO), bisan pa nga normal alert status lang ang kapolisan sa lalawigan, gipakusgan gihapon nila ang police visibility ug presensya labina sa mga tourist destination.
Kini tungod usab sa daghang mga kalihukan sa naghingabot nga kasaulogan sa Pasko lakip na ang “misa de gallo” nga sugdan sa Disyembre 16.
Nasayran nga nakigtigom online sa mga kadagkuan sa rehiyon si Police Brigadier Gen. Anthony Aberin, director sa Police Regional Office (PRO-7) niadtong Lunes human ang nahitabong pagpamomba nga gikamatay sa labing menos upat ka mga biktima.
Usa niini ang Bol-anon nga si Junrey Barbante, taga Barangay Dipatlong, lungsod ss Maribojoc.
Matud ni Nuez, gipakusgan usab nila ang pagmonitor sa mga tawo labina kadtong gikan sa mga dapit nga duol sa nahitaboan nga mosulod sa probinsiya sa Bohol.
Si Nuez nagkanayon nga gihugtan usab og bantay sa kapulisan ang lalawigan subay sa mando ni PNP-Bohol Provincial Director Col. Lorenzo Batuan tungod sa naandan nga pagdagsa sa mga tawo ning buwana.
Walay ipada nga dugang pulis ang PRO-7 dinhi sa Bohol.
Sa pikas bahin, ang Muslim community dinhi mihatag og pasalig nga motabang og bantay sa seguridad sa probinsiya.
Si Nuez miawhag usab sa publiko nga tabangan sila pagbantay ug paghatag og mga impormasyon kun dunay mga kadudahang mga kalihokan diha sa ilang mga lugar. (PIMO/AT)
