By PR | 11:55 AM December 06, 2023
Gilab-as ang panag-igsoonay sa lalawigan sa Bohol ug sa Jiangxi, China atol sa pagduaw sa usa ka bahan sa naulahi sa Kapitolyo niadtong Disyembre 5.
Ang mga sakop sa delegasyon sa Jiangxi pinanguluhan ni Bise Gobernador Shi Ke ang delegasyon mainiton nga giabi-abi usab ni Bise Gobernador Dionisio Victor Balite ug mga kadagkuan sa lalawigan.
Si Balite maoy kasamtangang gobernador samtang si Gobernador Erico Aristotle Aumentado mitambong sa tigum sa Local Climate Action Summit for the Conference of Parties( COP28) sa nasud sa Dubai.
Ang mga lalawigan sa Jiangxi ug Bohol naglagda og “sisterhood agreement” niadtong 2006 sa termino ni kanhi Gov. Erico Aumentado. Si Aumentado maoy nipirma sa maong katalian uban ni kanhi Gobernador Huang Zhiquan sa Jiangxi.
Nahimong mapuslanon ang maong sisterhood agreement ilabina sa natad sa agrikultura, turismo edukasyon, kultura, paugnat sa kusog, ug pagmina sugod niadtong tuiga.
Naestablisar usab ang sister mountain relationship tali sa Bohol Chocolate Hills ug Jiangxi Mt. Lushan sa Association for the World Famous Mountains.
Ning maong pagbisita, si Shi namahayag sa tinguha sa Jiangxi nga mas palawman ang panaghigalaay ug kooperasyon tali sa duha ka probinsya.
Sentro usab sa diskusyon ang bahin sa renewable energy ug ang posible nga pagbisita sa chinese investors nganhi sa Bohol aron pagpahigayon og pagtuon ug pamuhunan sa lalawigan, bahin sa solar energy aron matabangan ang Bohol, pagpakunhod sa presyo sa kuryente.
Lakip usab nga gihisgutan ang imprastraktura ug ang posible nga market research ug investment bahin niini.
Kini mahinungdanong kabahin sa strategic agenda sa Kagamhanang Probinsyal ubos sa liderato ni Aumentado ug Balite.Â
Gipadangat usab sa mga bisita ang pasalamat sa mainitong pag-abiabi sa kagamhanang probinsyal ug uban ang pagdapit nga mutambong ang mga opisyales sa Bohol atol sa ilang tinuig nga tourism conference.
Isip pagpadayag sa kahimuot sa duha ka lalawigan, gipahigayon ang pagsukli-ay og mga regalo tali sa duha ka probinsya.
Kauban ni Shi sa maong delegasyon sila si Sun Changxiang, Jiangxi Health Commission Deputy Director-General; Liang Xiaokang, Jiangxi Department of Commerce Deputy Director-General; Wan Yijun, Jiangxi Department of Culture and Tourism Inspector; Shu Weiguo, Secretariat Division of the General Office Analyst; Jin Ying, Jiangxi Foreign Affairs Office Secretariat Deputy Director and Principal Liaison; Du Yibo, Jiangxi Traditional Chinese Medicine Administration Bureau Deputy Division Director; Xu Chao, Jiangxi Office of Health Commission Deputy Division Director; and Zhang Qianfan, Jiangxi Department of Commerce.
Giabiabi sa mga opisyales sa lalawigan ang mga bisita sa usa ka welcome dinner sa Bellevue Hotel sa Panglao.
Naninguha ang gobernador nga makatambong sa maong welcome dinner apan naapiki sa panahon. Hinuon gipadangat sa gobernador ang iyang mainiton nga pagtimbaya kang Shi ug sa tibuok delegasyon. PIMOLMS /ALT
