By PR | 11:42 PM November 23, 2023
Duha ka balay ang giturn-over kagahapong adlawa, Nobyembre 22, didto sa lungsod sa Catigbian pinaagi sa
Libre Alagad ug Balay (LAB) sa Bohol Police Provincial Office (BPPO).
Gitambungan kini sa mga opisyal pinanguluhan ni Gobernador Aris Aumentado, Police Col. Lorenzo Batuan, hepe sa kapolisan sa lalawigan; ug Catigbian Mayor Elizabeth Mandin-Pace.
Ang maong mga balay bunga sa programa nga LAB.
Si Mateo ug Nita Calapuan mao ang benepisyaryo sa balay nga nahimutang sa barangay Mahayag Norte, Catigbian.
Gitugyan ang duha ka mga pinuy-anan atol sa seremonyas nga gipangulohan ni Aumentado, Batuan, Mandin-Pace, Police Lt. Col. Norman Nuez, nga girepresentahan ni Maj. Andie Corpus ug Capt. Jefrin Eulogio, hepe sa Catigbian.
Wala nag-usik og higayon ang pundok nga nideritso sa barangay Maitum, pinuy-ana sa mga benepisyaryo sa LAB nga sila si Ariel ug Arlyn.
Si Kapitan Virgilio Lanoy sa barangay Maitum personal nga niabi-abi sa mga dinapit. Matud pa niya nga ang pagbisita sa gobernador sa usa ka haya sa namatay sa gidudahang sakop sa walhong kalihan maoy hinungdan nga nahimong benepisyaryo ang magti-ayon sa LAB.
Iyang gisabot nga sa paglabay ni Aumentado sa pinuy-anan nga gamay ug guba, gibati kinig kaluoy.
Gikuhaan dayon kini sa gobernador og hulagway ug giduso ngadto sa BPPO aron pagtino kon mupasar kini sa kriterya sa programa sa LAB.
Si Corpus kinsa gitahasan sa pagpasabut sa katuyoan sa programa, nagkanayon nga ang serbisyo nga tinooray ug pagtinabangay dili hikalimtan sa komunidad.
Samtang ang hepe nga Eulogio, kinsa namahayag nga gitutokan ang pagpatukod sa maong mga balay, nagpadangat sa iyang pasalamat.
Iyang gipdayeg ang iyang mga katimbang sa pagtukod sa mga pinuy-anan nga mao ang Bureau of Fire Protection pinanguluhan ni SFO4 Lowell Lumbab ang mga opisyales sa barangay opisyales
Nitabang usab ang mga sundalo sa Philippine Army nga nadestino sa lungsod ug mga indibidwal nga nitabang sa pinansyal sama ni Congresswoman Vanessa Aumentado, ang gobernador, mga magpapatigayon ug uban pang mga stakeholders.
Gisaysay ni Batuan nga dihang gisugdan nila ang LAB, wala sila’y pondo busa niduol kini ngadto sa kongresista sa ikaduhang distrito nga mao ang kapikas sa gobernador.
Kahinumduman nga ang kongresista ug ang gobernador nihatag sa BPPO og pinansyal na tabang gikan sa ilang mga personal na pondo aron mahuman ang tulo ka balay alang sa tagsa ka benepisyaryo sa matag distrito..
Kasamtangan nga 10 na ka balay ang napahimuslan sa mga benepisyaryo ug ang gisubhan sa Maitum nagkantidad og P126,000.
Sa iyang bahin, ng mayora namahayag nga sumala sa kasinatian, iyang nabati ang pagkamatinud-anon sa gobernador.
“Tungod kay di mi kauban og grupo, dapat iya kung dumtan kay wa ko makatampo sa iyang kadaogan,” matud pa niya.
Dugang ni Mandin nga wala magtan-aw si Aumentado sa iyang pagserbisyo kung kaalyado ba o dili ang tabangan.
Sa tanan niini nga hangyo, gibuytag ni Mandin nga way gibalibaran si Aumentado.
Tungod niini, giawhag sa mayor ang tanan nga maghiusa ug magtinabangay samtang idapit usab niini kadtong atua sa pikas pundok sa pagpaminaw.
Sa laing bahin, gipasidan-an sa gobernador ang mga opisyales sa barangay nga dili maayo mamulitika sa panerbisyo, ug nga kung buot magpapili pagbalik angayan nga muserbisyo sa kinatibuk- an.
“Kining politika is always a vision,” dugang pa ni Aumentado.
Matud pa niya, iyang nakita nga ang bisyo ni Mandin mao ang bisyo sa pagserbisyo sa katawhan busa angayan usab kini nga hugopan.
Si Aumentado namahayag sa mga anaa pa sa pikas nga baruganan paghinumdum nga andam ang gobyerno mudawat kanila ug maminaw kung unsang hinungdan ngano nga nagpasakop sila niini.
Ubos sa iyang pagdumala, gihatagan niini og pagtagad ang pagdapit sa mga nahimiling sakop sa kalihukan nga mamalik sa sabakan sa gobyerno. ALT/PIMO
