By PR | 12:30 AM November 07, 2023
Nagpadayon og saka ang nakolekta gikan sa sand, gravel ug quarry human ang Bohol Mineral Resources Regulatory Office (BMinRRO) nakahipos og kapin P36 milyones gikan niini.
Sumapal sa labing ulahing taho gikan sa BMinRRO, ang nakolekta kutob sa buwan sa Oktubre ning tuig mokabat na sa P36,026,405.40.
Subay sa pinakaulahing accomplishment report, P1,635,534.00 ang nahipos gikan sa regular fees, taxes, fines, ug penalties ning maong bulan.
Sumala pa, P1,594,000.00 niini gikan sa Provincial Mining Regulatory Board (PMRB), samtang ang nahimiling P41,534.00 gikan sa Provincial Mining Adjudication Board (PMB).
Ang PMRB gitahasan mangolekta og mga bayronon sama sa application, verification, concession ug permit lakip na ang buhis sa environmental ug extraction. Ang PMAB usab ang mangolekta sa mga multa ug silot alang sa mga operator, contractor, ug mga negosyante nga dunay kalapasan sa ilang mga kalihokan sa pagmina.
Tungod ning maong kalambuan, gilauman nga malabwan sa BMinRRO ang gitarget nga P40 milyones nga gross income ning tuig 2023 diin dunay 30% niini bahin sa probinsiya sa kantidad nga P12 milyones.
Niadtong Hulyo hangtod Disyembre 2022, ang kagamhanang probinsiyal nakakolekta og P12,866,000.00 nga nakatampo sa kinatibuk-ang kita nga P16,793,000.00 sa maong tuig, o 83.96% sa gitarget nga gross income kon ikumpara usab sa 48.07% sa 2021.
Dugang pa, gipahigayon sa BMinRRO ang paghatag og 11 ka nga mga permiso, pagsusi sa 14 ka mga applied areas, ug pag-assess ug pag-evaluate sa 18 ka mga permitted areas.
Ang senemanang monitoring sa Bohol Environmental Protection Task Force (BEPTF) sa 124 ka mga lugar miresulta sa 63 na ka mga sakyanan nga na-impound.
Sa pagkakaron, aktibo ang buhatan sa pagpahigayon sa nagpadayon nga rehabilitasyon sa mga gimina sa tulo ka mga lugar sa Alicia, Talibon, ug Trinidad.
Sa kinatibuk-an, 27 ka mga miting nga gipahigayon tali sa PMRB-TWG, PMRB, PMAB, ug technical conference gikan sa Enero ngadto sa Disyembre 2023.
Niadtong Oktubre nitambong si Gobernador Aris Aumentado sa tigum sa PMRB ug PMAB kalabot sa Special Transport and Disposal Permit (STDP) diin iyang gidasig ang mga board members nga mag-matinud-anon ug makiangayon sa pagpatuman sa mga lagda ug ordinansa.
Ang pagsaka sa koleksiyon sa sand, gravel ug quarry usa ka pagpamatuod sa pagpatuman sa balaodnong pagpanalipod sa kinaiyahan ug maayong pagdumala ubos sa administrasyong Aumentado-Balite. (PIMO/JSS)
