By PR | 08:31 PM October 24, 2023
Gipahalipayan ni Gobernador Aris Aumentado ang mga otoridad sa balaod human ang malampusong pagluwas sa usa ka Chinese national nga gidagit sa sindikato.
Atol sa malampuson nga pagluwas, nasikop usab sa rescue team ang upat ka Chinese national ug duha ka Pilipino gikan sa Manila.
Ang maong operasyon gihimo adlawng Martes, Oktubre 24, sa Barangay Poblacion sa lungsod sa Panglao.
Nagtambayayong sa malampusong kalihukan ang provincial intelligence unit sa Bohol Provincial Police Office sa Provincial Mobile Force Company (PMFC), kapulisan sa Panglao gipangulohan ni Police Capt. John Sanchez, kapulisan sa Dauis pinangulohan ni Police Lt. Zen Cheung, uban sa Provincial Intelligence Unit ug sa Regional intelligence division sa Police Regional Office 7.
Ang hiniusang bahan nagluwas sa Chinese nga negosyante gikidnap niadtong Oktubre 23 sumala pa sa Police Regional Office-7.
Dugang sa maong buhata, ang mga sakop sa kidnap-for-ransom group nibiyahe gikan sa Manila paingon sa probinsiya aron pagdagit sa biktima ug gituo nga gikan og dagko nga sindikato.
Dihang naalarma ang ilang buhatan human gikataho ang insidente, gilusad dayon ang rescue mission.
Malampusong nasuta sa mga operatiba ang nahimutangan sa mga suspek human mituman ang pamilya sa biktima nga bayran ang gipangayo nilang ransom money.
Si Aumentado, sa iyang opisyal nga Facebook page, mipahalipay sa mga tinugyanan nga nagpahigayon sa malampuson nga operasyon.
Dugang pa sa gobernador nga usa ka isolated case kon talagsaong kaso ang maong insidente ug nipasalig sa mga Bol-anon nga ang kagamhanang probinsiyal nagpabiling aktibo sa paningkamot aron ipatunhay ang kalinaw ug kahusay sa lalawigan. (PIMO/GMC)
