By Marisol Bo-oc | 10:42 PM October 22, 2023
Hangtud karun wala pa muhupa ang resulta sa Governor’s Cup 2023 finale nga nahitabo gahapon, Oct. 21, didto sa lungsod sa Calape.
Gipahigayun ang duwa sa Tagbilaran City vs Jagna sa junior division ug Tagbilaran City vs Talibon sa open division.
Champion ang Tagbilaran sa junior pero pildi kini sa open division.
Ang Governor’s Cup mao ang pinadakong liga sa basketbol sa probinsya sa Bohol mao nga gitan-aw kini sa libuan ka mga Boholano nga hilig sa maong isport.
Viral usab ang usa ka video clip nga diin makita ang Tagbilaran Team nga adunay gikuptan nga tarpaulain. Gikuptan ang tarp ni kanhi konsehal sa Tagbilaran nga si Jojo Bompat ug ni Bise Mayor Adam Jala.
Ang nakasuwat sa tarp mao ang ” Sorry, Jagna gikan Albur ang akong Calamay.”
Ang Jagna nabantug kini sa sikat nga calamay.
Pagkahuman sa duwa nga napildi ang Team Jagna sa Team Tagbilaran, adunay laing tarp na sab ang mabasa. Ang nakasuwat, “Puwede na ba mukaon og calamay?”
Wala kini magustui sa mga supporter sa Jagna nga matud nila usa kuno kini ka biaybiay ug nakaminus sa Team Jagna.
Ming-ani kini og nagkalaing-laing reaksyun sa social media nga sayup kini kung nagpakatok ra si Jala.
” I am triggered. I woke up to the conversation in the comment section of one certain post, and I am appalled by your “VM’s” inability to see the wrong in what he did and that to me is a huge, huge red flag. You’re so called “pakatok” is inappropriate, Calamay is Jagna’s delicacy and hinaguan intawn nas mga calamadera. You can make a joke about anything but ayaw ang hinaguan, gipatuan ug singot ug labaw sa tanan panginabuhian sa usa ka tawo,” matud sa usa ka Facebook post.
“Basic man unta na nga mindset pro nganung murag wa ka kahibaw dha “VM”. And being someone nga apo ug anak sa calamadera, I am extremely displeased. Kanang CALAMAY nga imung giyaga-yagaan usa na sa rason nga nahuman kog eskwela! And we don’t need you to promote our product kay known na daan ang Jagna nga HOME OF ORIGINAL CALAMAY! Cge lang “VM”, dli man pud ko magdumot pro dli ko kalimot, basin diay puhon, tumoy sa ahung ballpen mohukom! It’s funny how you were once a Congressman in our district, ” sumpay sa post.
“SORRY JAGNA!, GIKAN ALBUR AKONG CALAMAY.” Eh kuyaw ning Vice sa Tagbi mokantsaw no? Taga City of Friendship lagi ka?, ” matud ni Larry Parinas sa iyang Facebook post.
Aduna usab minglaban kang Jala nga dili angay seryisohon ang nakasulat sa tarps kay para pabuhi ra sa dugo.
“Asa goy insulto ana nga igo raman siya gapahibaw nga gikan og albur iyang calamay,” matud ni Kirby Digal sa iyang Facebook post.
“Move on nata,” matud ni Doy-on sa iyang Facebook post.
Wala pay opisyal nga pamahayag si Jala kabahin sa isyu.
