By PR | 11:16 PM October 12, 2023
Bisan pa sa mga kalambuan sa natad sa turismo, padayon gihapon ang paningkamot ni Gobernador Aris Aumentado aron iduso ang mga lakang sa dugang pang mga kalambuan.
Subay niini, personal nga gibisita ni Aumentado ang Vice Chairman sa Tourism Infrastructure and Enterprise Zone Authority (Tieza) pinaagi sa chief operating officer niini nga si Mark Lapid aron pagduso sa Tourism Development Plan sa mga major tourism sites lakip na sa mga lungsod sa Anda, Carmen, Panglao ug Loboc.
Gihangyo usab ni Aumentado nga himoan og Tourism Development Plan ang mga major tourism sites sa Bohol sama sa Anda, Carmen , Panglao ug Loboc.
Gihisgutan usab ni Aumentado atol sa iyang pagbisita kang Lapid niadtong Oktubre 11 ang gitawag og Hyperbaric Chamber para sa Bohol.
Tumong sa gobernador nga magamit kini panahon sa emergency, ilabina nga nagkadaghan ang mga turista, mapalokal o langyaw.
Lakip usab sa nahisgotan ang kahimtang sa Balicasag Island diin determinado si Aumentado nga panalipdan ang isla batok sa mga abusadong illegal tour operators ug dive shop operators.
Sa maong iyang pagduaw didto, gisubay ni Aumentado ang pathway seawall sa Alona Kew sa iyang tinguha nga maprotektahan ang kabaybayonan sa pagkakankan ug pagsaka sa kadagatan.
Ang UNESCO designation sa Bohol Island isip usa ka Global Geopark mas nakapaaghat sa gobernador nga makabaton ang probinsya sa usa ka malungtarong turismo ilabina nga ang maong UNESCO Global Geopark designation nag-inusara sa tibuok Pilipinas. (PIMO/ALT)
