By PR | 12:10 PM April 27, 2022
Usa ka “ngiwngiw” o owl nga nakit-an ang giuli ngadto sa buhatan sa Municipal Environment and Natural Resources Office sa lungsod sa Tubigon.
Gitahan ni Merlyn Torrejas, usa sa mga empleyado sa Municipal Engineering Office, ang usa ka langgam ngadto ni Junjie Geronimo, ang atong Municipal Environment and Natural Resources Officer.
Kanayon ni Torrejas nga nakita niya ang maong langgam nga owl o “ngiwngiw”duol ra gyud sa ilang panimalay didto sa Sitio Paka-paka, Barangay Tinangnan. Kay nahadlok man siya basin unya kalitan siyag labok, maong namalihog siya sa mga bata nga nagdula sa duol nga maoy mo-rescue sa maong langgam.
Tungod kay natrap man ang mga pako sa langgam, wala maglisod ang mga bata sa pagrescue niini sa iyang nahimutangan.
Sa dihang natunol na sa mga bata ngadto ni Torrejas ang langgam, nasuta niya nga samdan diay kini.
Dugang pa niya, iya gyud dayon kining gipakaon og gipainom tungod kay luya man kini sa iyang paminaw ug gilaraw ang dali nga pagtahan niini sa buhatan sa MENRO aron mahatagan sa saktong pagtagad.