By PIA-Bohol | 03:29 PM October 27, 2020
Wala man malakip ang Bohol sa mga lalawigan nga Muslim nga obligado nga saulogon ang “Maulod un Nabi,” o Muslim holiday sa ika 12 ka adlaw sa ika tulo ka lunar month nga gituohan’g maoy petsa sa pagkahimugso sa katapusang propeta segun sa mga Muslim nga si Mohammed, mahimong mapasaylo ang mga Muslim nga dili motrabaho sa Octobre 29, 2020.
Kini subay sa Presidential Decree 291 nga gilagdaan ni Presidente Ferdinand Marcos penetsahag Septembre 12, 1973 nga nag-ila sa mga holidays sa mga Muslim ug naglatid sa pagpatuman niini.
Matud pa sa PD 291, agi og paglig-on sa nasudnong komunidad, ang mga Muslim holidays opisyal nga saulogon ug handumom sa mga lalawigan sa Sulu, Tawi-Tawi, Davao del Sur, Davao Oriental, Davao del Norte, South Cotabato, North Cotabato, Sultan Kudarat, Lanao del Sur, Lanao del Norte, Zamboanga del Sur, Zamboanga del Norte ug mga syudad nga giharian sa mga Muslim.
Gilatid ang mosunod nga mga Muslim holidays nga handumon na: Eid-ul-Adha (Hariraya Haji), Muharram (Ashura), Eid-e-Milad-un Nabi (Ascension), Eid-ul-Fitr, ug ang Maulod-en-Nabi (adlaw nga natawhan sa propeta.
Ug samtang gitataw sa Proklamasyon nga didto lang ang opisyal nga paghandum sa mga holidays, gibutyag sa section 3 sa nahisgutan nga balaod nga mahimo usab nga handumon ang mga Muslim Holidays sa mga lalawigan ug syudad nga may daghang Muslim o segun sa hangyo sa mga residente nga Muslim o sa proklamasyon sa Presidente.
Dugang pa niini, sa Section 5 sa nahisgutan nga balaod, giingon didto nga ang tanang mga epleyado sa kagamhanan nga mga Muslim nga tua nanarbaho gawas sa mga lalawigan nga opisyal nga maghandum sa mga holidays, pasayloon o i-excuse sila sa pagpakita sa trabaho-an aron makatuman sila sa paghandum sa mga nahisgutan nga pagdandum.
Alang usab sa mga Muslim nga nanarbaho sa pribado nga mga buhatan, ahensya o establisemento, usa ka deklarasyon gikan sa Presidente ang gikinahanglan aron usab sila ma excuse sa wala pagsipot sa trabaho-an ug dili makaltasan sa sweldo ug mga benepisyo sa kinatibuk-an adlaw nga gideklara ang Muslim holiday, segun sa balaod.
Sa laing bahin, usa ka long weekend ang nagpa-abut sa mga trabahante sa pribado ug publikong mga buhatan sa Nobyembre 1 ug 2.
Ang Nobyembre 1, regular nga holiday sa Pilipinas isip Adlaw sa mga Santos, samtang ang Nobyembre 2, Lunes, saulogon na usab ang lain nga special non-working holiday segun sa Proclamation 845 nga nagdeklarar sa mga regular ug special Holidays sa 2020.
Lat-anag lang og us aka adlaw, holiday na usab sa Bohol sa Nobyembre 4, 2020, ang adlaw nga gihandum isip adlaw nga natawhan sa Bol-anong Presidente, Carlos P. Garcia.
Kini segun sa Republic Act 7448 o ang nagdeklara sa Nobyembre 4 nga Special Non-Working Holiday sa lalawigan sa Bohol, samtang gilansang ang Nob 2-6 isip Carlos P. Garcia Week. (rahchiu/PIA-7/Bohol)
