By Ric Obedencio | 11:21 PM June 14, 2023
Si Mayor Joseph Achacoso Rañola mipahibalo sa iyang mga sakop sa munisipyo sa Jagna nga mokanaog siya isip mayor ni’ng lungsod sa umaabot Disyembre 2023.
Kini iyang gi-anunsyo atol sa kasaulogan sa ika-125-ka-tuig sa kaugalingnan sa nasud nga gihimo sa Plaza de Jagna niadtong gabii sa Hunyo 12, 2023 atubangan sa mga kawani ug mga opisyal sa lungsod.
Ang programa sa adlaw sa kaugalingnan (Independence Day) mao ra’y programa nga gihimo sa gabii ning lungsod sa Jagna nga gitambongan ni Bise-Mayor Pagar ug mga konsehal.
Ang iyang pagkanaog sa pwesto isip mayor makapahimo ni Bise-Mayor Pagar sa pag-asumir isip mayor sa Jagna sugod sa Enero 01, 2024.
Kon mahitabo kini, si number one councilor Wilfredo Ranis Vinalon mao ang mopuli sa pwesto ni Pagar, isip bise-mayor.
Wala pa masuta’ kon kinsa ang mopuli sa mabakante nga luna sa pagka-konsehal sa Sangguniang Bayan kon mopuli si Vinalon sa bakanteng pwesto sa bise-mayor.
Apan, si Rañola nagkanayon ug naniguro nga dili siya mobiya sa Jagna ug magpadayon siya sa pag-amuma niini bisan og di na siya ang mayor sa lungsod.
Matud niya nga mobalik siya sa kaulohan (Manila) aron iyang ipadayon ang iyang “love of work” nga mao ang budgeting kay siya usa man ka “budget expert.”
Si Rañola usa ka budget consultant sa mga dagkong opisyal sa Manila ug mga senador.
Ug ang iyang pamilya hatagan niya sa panahon nga gikinahanglan isip personal nga rason sa iyang pagkanaog isip mayor sa Jagna.
Matud niya nga di na unta siya magpapili pag-usab sa pagka-mayor niadtong Mayo 2022, apan, wala niya balibari ang hangyo sa iyang mga dumadapig sa lungsod ug siya gibuligan balik pagka-mayor.
Sa dihang gipangutana ning tagsulat kon adunay susama nga petisyon aron siya agnihon nga dili mohawa isip mayor, Si Ranola di na magpapugong ug siya midugang nga iyang gipasabot ang katawhan sa Jagna. Naglaum siya mosabot ra ang Jagnaanons sa iyang hukom. (rvo)
