Hi-ways nga maglunop matrabaho sa 2024 pa

By Rey Anthony Chiu | 07:40 AM May 08, 2023

Kinatibuk-an nga P275 M ang kinahanglan sa kagamhanan aron mahatagan og solbad ang nga kadalanan nga sakop sa nasudnong highways nga namatikdang naghatag og kahasul sa mga manakayan ug motorista kay maglunop og dili matabok og sakyanan kon mouwan.

Sa duha ka section sa national highway nga buot ni Bokal Nathanile Binlod nga tun-an aron makahatag og rekomendasyon sa kagamhanan, gibutyag sa Department of Public Works and Highways (DPWH) nga ang seksyon nga kanunay lunopan sa Sambog Corella ug sa Candabong Loboc, ila na nga gisulod sa ilang priority projects alang sa 2024.

Kini nagpasabut nga hangtud masulod sa budget sa nasundong kagamhanan pinaagi sa DPWH, dili pa mahatagan og alibyo ang mga nanakayan ug mga motorist nga mabalda sa ilang mga trabaho ug gimbuhaton hangtud matrabaho sa 2024.

Dugang sa DPWH nga ila na nga gibanabana nga mokabat sa P50 Milyones ang abton sa pagpa-usab sa slope sa dalan, paghimo og drainage ug pagpakongkreto niini pag-usab, aron masolban na ang lunopan nga section sa Sambog Corella.

Sa laing bahin, ang suliran sa Candabong Loboc, tungod sa ka komplikado sa solusyon niini, nagpapahat ang DPWH og P100 milyon.

Ang section sa Candabong nagalangkob sa pagbaha sa mga inawas sa mga kanal nga gikan sa Manmade Forest ug kasagaran nga mosungasong sa tubig, mamatyan sa makina ug madaut ang sakyanan.

Gawas sa duha ka nahisgutang sections, gitahu usab sa DPWH nga ayohon usab nila sa 2024 kon mapundohan og P50 M ang section sa Bacani Clarin, nga kinahanglang patas-an ang lebel sa karsada aron dili maabut sa tubig nga mosanap sa humayan.

Dinhi sa Tagbilaran City, ang kahasul nga dala sa baha ug lunop nga masinati atbang sa Bohol Wisdom School masolbad unya kay may inisyal na nga pundo nga P75M alang sa paghimo og kanal gikan sa Penaflor Street paingon sa Taloto, diin didto ipahubas ang tubig, segun sa DPWH. (PIA-7/Bohol)

)

Leave a Reply

%d bloggers like this: