By Rey Anthony Chiu | 07:43 AM April 15, 2023
Kinahanglan una nga marehistro ug mahimong accredited nga kahugpungan sa Sangguniang Panlalawigan ang usa ka entity aron mahatagan kini sa pribilihiyo nga maambitan sa tanang hugpong nga rehistrado ug accredited.
Kini maoy tubag sa Sagguniang Panlalawigan ngadto sa Ubay Water Service Cooperative (UWASCO), kinsa ming suwat ngadto ni Gobernador Erico Aristotle Aumentado aron mohangyo nga makagamit sa libre sa Geo Resistivity Machine ug serbisyo sa pagbuho alang sa bag-ong tinubdan sa tubig mainum.
Kahinumduman nga si UWASCO MPC General Manager Alberto B. Boiser mihangyo kang Gobernador Aumentado nga maghuwam sa mga kahimanan niini aron makapalapad sila sa ilang serbisyo sa panubig ngadto sa tanan’g Ubayanon.
ANg UWASCO MPC kasamtangan nga nagsupply og tubig sa 7 lamang ka barangay sa lungsod.
Kini ang Antipolo, Katarungan, Fatima, Poblacion, Tapon, Kalanggaman ug Bood.
Lain nga 37 pa ka barangay sa lungsod ang wala maserbisyohi sa UWASCO , ug gani sa pito ka barangay, dili tibuok adlaw ang agas niini kon dili girasyon pa usab.
Kana tungod kay dili paigo ang tubig nga gigamit sa kompanya kay kini gikan lamang sa dam.
Naglaraw ang UWASCO nga mangita na usab og laing kasaligang tinubdan sa tubig aron ilang maalagaran ang nahibiling mga barangay.
Niini, nakigsabut na ang UWASCO sa Provincial Agriculture Office aron matumbok na ang mga lugar nga himoan og bomba sa tubig, apan dili igo ang ilang gipahat alang sa pag-ugmad niini, hinungdan nga nanghagyo sa gobernador.
Sa katungod ni Bokal Vincenzo Arcamo, subay sa Section 3, Article II sa Provincial Ordinance No. 2021-023, nga nagparegulate sa paggamit ug naglatid sa abangan sa mga makinarya sa Bohol, ang abangan sa Manual Water Drilling Rigs (hammer type) anaa sa P 300 matag piye gamit ang numero 6 nga barena ug manginahanglan kini og krudo nga anaa sa 10 ka litros matag oras.
Sa laing bahin, gibutyag ni Arcamo nga ang abangan sa Geo Resistivity Machines mokabat sa P20,000.00 kon pribado ang mogamit og P 10,000 kon pangpubliko nga gamit.
Kini maglakip na sa 3 ka technicians gikan sa Provincial Government samtang tugbangan usab kini sa 4 ka trabahante aron matibawas ang survey.
Makahangyo unta ang UWASCO MPC kon kini na accredit pa sa SP apan wala pa kini malista mao nga gitambagan kini nga magproseso sa ilang accreditation aron makakuha sa diskwento nga 50%. (PIA-7/Bohol)
