By Rey Anthony Chiu | 01:07 PM November 23, 2022
Agi og pagtamud sa Adlaw ni Santa Cecilia, patrona sa mga musikero, gipasundayag sa mga katawhan nga naa sa teatro sa Loboc ang Santa Cecilia Musical, us aka inawit nga saysay sa kinabuhi sa santa nga martir.
Gituohan nga bayae nga Romana, si Cecilia mipanaad nga mabuhi nga ulay, apan gipugos kini sa iyang banay sa pagpamana sa usa ka pagano nga si Valerian.
Sa adlaw sa ilang kasal, nagpalain si Cecilia ug nagkanta og mga pagdayeg sa Dios.
Sa susamang adlaw sa iyang kasal, gikompisal ni Cecilia ngadto sa iyang pamanhonon nga adunay anghel nga nagbantay kaniya, ug maoy magpadangat sa silot ngadto kang bisan kinsa nga manghilabut sa iyang pagkababaye.
Hinuon, gipasalig usab niya nga kon tahoron sa iyang pamanhonon ang iyang pagka-ulay, iyang higugmaon ang iyang mabana.
Niini, nangita si Valerian sa oportunidad nga ikahibalag ang anghel nga nagbantay sa iyang pangasaw-onon.
Giingnan ni Cecilia ang iyang pamanhonon nga makita niya anghel kon moadto siya sa ikatulo nga batong timan-anan sa Via Appia sa Roma, unya magpabunyag ni Papa Urban I.
Human mapabalhin ang tinuohan sa nabana, nakita niini ang anghel nga naga korona kang Cecilia sa tinuhog nga mga rosas ug lila.
Human sa pila ka tuig, nahimo usab nga martir si Cecilia human patya usab ang iyang bana nga si Valerian sa paglutos niadtong panahona.
Giigngon nga sa makatulo nga higayon, gitigbas sa espada ang liog ni Cecilia apan nagpabilin pa gihapon siya nga buhi sulod sa sunod nga tulo ka adlaw, kanus-a iyang nahangyo ang Santo papa nga ipabarug sa iyang balay ang usa ka simbahan.
Si Santa Cecilia, sukad niadto, giisip na nga patrona sa mga mag-aawit ug nga musikero.
Sa iyang kapistahan, Nobyembre 22, naadnan na sa Loboc nga maghimo og mga konsyerto ug programa pagsaulog sa Santa nga ilang ikaduhang Patrona.
Ug kauban sa mga molupyo sa Loboc nga giilang sentro sa musika sa Bohol, naghugpong ang mga katawhan: mga musikero ug labing batid nga mga mang-aawit, dinuyogan sa Kasing Sining Theater Company aron ikatanyag ug ikapasundayag ang Santa Cecilia Musical karong adlawa, matud ni Gardy Labad, executive director ug Founder sa Kasing Sining.
Sa pasundayag igkita ang mga labing hawod nga mga musikero ug mang-aawit, magtugtogay sa mga instrumento ug mga pangtambol sa us aka engrande nga pagpadayag sa kinabuhi sa martir nga gitahud sa mga musikero sa Loboc.
Ang pasundayag gihimo kagabii (Nob. 22) sa sulod sa napahiuli nga simbahan sa Loboc nga gihalad alang kang San Pedro ug San Pablo, ang Diocesan Shrine sa Birhen sa Guadalupe Extremadura sa Loboc diha sa Poblacion sawang sa Loboc.
