By Rey Anthony Chiu | 08:02 PM August 23, 2022
Bisan pa kon gipasalig sa kagamhanan nga dili na mopila aron makakuha sa Educational Assistance, mipahibaw ang Department of Social Welfare and Development (DSWD) kon kinsa man ang dili prayoridad sa hinabang.
Kahinumduman nga gisugdan na sa DSWD niadtong Sabado Agosto 20 ang pagpang-apudapod sa DSWD Assistance to Individuals in Crisis Situations (AICS) didto sa mga Buhatan sa DSWD. Ang sunod ngabpay-put mahitabo sa sunog nga mag Sabado sa Septembre.
Sa AICS nga gihimong educational assistance, ang mga anaa sa prayoridad sa makadawat mao ang mga tinun-an nga maoy gisaligan sa pagkaon sa pamilya, anak sa mga nag-inusara nga ginikanan, anak sa Overseas Filipino Workers, Persons with Disabilities, estudyante nga nagtrabaho, anak sa biktima sa Human Immune Virus, anak nga misinati og pisikal nga pag-abuso, estudyante nga gibiyaan sa ginikanan, kabataan sa ginikanan nga walay klaro nga panginabuhi ug mga kabataang biktima sa katalagman.
Sa laing bahin, dili prayoridad sa hinabang “ang mga anak sa banay nga apil sa Pantawid Pamilyang Pilipino (4Ps), mga tinun-an nga may scholarship na nga gidawat, ug mga estudyante nga anaa na nagtungha sa state universities ug colleges,” segun sa DSWD sa labing uwahi nga pahibalo.
Sa mga ginikanan nga may tinun-an nga pwede makadawat sa hinabang, mag andam lamang sa tulo ka kopya sa Certificate of Enrollment o Certificate of Registration sa bata, school ID, o Authorization sa Estudyante nga labaw na sa 18 ang edad apan dili maoy miprocess sa tabang, ug ID sa ginikanan nga gi-isyu sa kagamhanan.
Mipahinumdom usab ang DSWD nga ang hinabang, magbase gihapon sa assessment sa rehistrado nga social worker gikan sa lokal nga Social Welfare and Development (SWAD) office.
Sa hinabang, usa ka libo ang madawat sa bata sa elementarya, duha ka libo ang sa High School, tulo ka libo sa Senior High School, ug upat ka libo alang sa estudyante sa kolehiyo ug vocational courses.
Segun usab sa lagda, tulo ra ka tinun-an sa usa ka banay ang pwede modawat sa tabang. (RAHC/PIA7/Bohol)
