By Rey Anthony Chiu | 06:57 PM July 12, 2022
Usa ka Provincial Executive Committee (PEC) nga may lima ka Task Forces ang gimugna gikan sa Executive order No. 7 nga gilagdaan ni Gob Erico Aristotle Aumentado aron sa pagpahimutang sa mga lakang sa pagpugong ug pagkontrolar sa pagkuyanap sa duha ka gikahadlokang sakit sa mga mananap nga naghulga sa mga industriya nga nagbuhi sa daghang Bol-anon.
Gilagdaan niadtong Hulyo 4, 2022, ang Executive Order No. 7 series of 2022, nagtukod sa PEC ug lima ka Task Forces alang sa African Swine Fever (ASF) ug sa Avian influenza (AI) nga gilangkoban sa napulo ka hepe sa mga Buhatan sa Kapitolyo lakip na ang hepe sa SP Committee on Agriculture, Health, Trade and industry, uban ang mga presidente sa 20 ka mga kahugpungan ug ahensya sa nasudnong kagamhanan, lakip na sa mga representante sa mga pundok sa mga mag-uuma sa manok, baboyan, manok pamuwang ug nga stakeholders nga nagkonsumo sa baboy ug manok nga mahimong apektado sa naghulga nga sakit.
Ang PEC nga ang tsirman mao ang gobernador, abagan sa Provincial Veterinarian ug mga sakop niini, maoy maghipno ug mag-aproba sa Provincial Preparedness ug Contingency Plan (PPCP sa ASF ug AI), nga maglatid sa direksyon sa mga polisiya nga ipatuman ug magpatuman niini.
Sila usab maoy mangita og pundo aron mapatuman ang plano ug magseguro nga dayag ang mga lakang sa pagsagubang sa hulga ug pagpakatag sa labing lapad nga kasayuran kabahin sa hulga sa nasampit nga mga sakit ngadto sa mga Bol-anong nabuhi sa nameligro nga industriya.
Ang PPCP sa ASF ug AI magasukad sa hugot nga pagpatuman sa mga polisiya sa kwarantina, pagtinabangay sa katawhan, LGUs ug stakeholdres, regular nga pagsuhid ug pagsumbong kon may namatikdang sakit, regular nga pagbag-o sa mga kasayuran aron marepaso usab ang mga polisiya ug mandu nga napagawas kabahin sa nahisgutang sakit ug pagpakatap sa labing bag-o ug labing epektibng kasayuran kabahin niini.
Lakip sa lima ka Task Forces nga nahulma sa EO No 7 mao ang Task Force Quarantine, Task Force sa Field Surveillance ug Monitoring, Task Force sa Information, panudlo ug pagpadayag, Task Force sa pagpabag-o sa kasayuran kabahin sa saki ug pagrepaso sa mga balaod niini, ug ang Quick Response Task Force.
Matud pa sa gobernador, bisan pa kon wala pa makaabut dinhi ang gikahadlokan nga sakit, ug bisan pa kong hiusahan gayud sa mga Bol-anon nga dili malusotan sa sakit, maayo na nga may igo nga pangandam aron masayud ang tanan sa angayan nga buhaton kon magkina-unsa.
Nunot usab niining Executive Order, gitahasan sa gobernador ang syudad ug mga kalungsuran nga anaay mga tugpahanan ug pantalan sa pagpahimutang na sa ilang kaugalingong quarantine personnel nga makasuporta sa katuyuan sa lalawigan.
Gimanduan usab sa mandu ang pagpakig-alayonay sa pagpatuman sa pagbantay sa mga utlanan ilabi na sa mga baybayon sa nga isla nga barangay aron mapugngan ang pagsulod, gituyo man o inosente nga pagdala sa mga kontaminado nga karne sa baboy, manok ug nga langgam nga mahimong magdala niining sakit.
Gimandu usab nga mahilakip sa Task Force sa kabarangayan ang Bantay Dagat, Barangay Livestock Aides, Barangay tanod ug mga opisyales nga maoy magmonitor sa mga modunggo nga sakayan o mananangat aron segurohon nga walay karne o giluto na nga baboy nga nadala gikan sa gawas sa Bohol, pasulod. (rahc/PIA-7/Bohol)
