By Rey Anthony Chiu | 05:36 PM April 11, 2022

Gianam na og deliver sa National Grid Corporation of the Philippines (NGCP) ang mga modular nga tore nga kabahin sa gamiton alang sa temporaryong tore nga agian sa usa sa duha ka linya nga maghatag og dinalian nga supply sa kuryente sa Bohol.

Kahinumduman nga naputol ang serbisyo sa korente sa Bohol diha nga naapektohan ang duha ka linya nga nagsupply sa korente sa Bohol sa panahon nga nanglampurnas ang bagyong Agaton sa Leyte.

Usa ka puthaw nga tore ang nahagsak ug laing tulo ka tore pa ang natakilid ug kinahanglan nga matarong aron makabalik ang pagtaud sa kable nga nagkutay sa 138KV nga linya gikan sa Ormoc paingon sa Maasin sa dili pa motadlas sa lawod sa Bohol.

Didto mismo sa Barangay Bunga, Baybay Leyte diin nahitabo ang pagdahile sa yuta nga gibarugan sa duha ka linya nga nagsupply sa korente sa Bohol nahitabo ang kadaut.

Kini nga kadaut maoy kinaingnan nga nawad an og supply sa korente ang Bohol ug pagkapawong sa serbisyo sa Boheco 1, Boheco 2 ug Bohol Light Co. Inc.

Matud pa ni NGCP Spokesperson Betty Betty B. Martinez, ilang ipabarug ang temporaryong mga tore nga apil sa Emergency Restoration System (ERS) hulip sa ayohonon nga mga tore.

Dala niini, gipakarga na sa NGCP ang mga temporaryong tore ngadto sa staging site nga duol na sa lugar nga ipabarug ang mga tore.

“NGCP has partially transported Emergency Restoration System (ERS) segments and other materials to a staging area in preparation for the initial restoration of one circuit of the Ormoc-Maasin line to supply power to Bohol,” matud ni Martinez.

Gipasalig hinuon usab sa NGCP nga ilang buhaton ang tanang paagi aron mahibalik sa labing dali nga panahon ang korente sa Bohol.

Himoon na usab sa mga lineman ang pag-assess ug pagsubay sa kaagian unya sa mga materyales sa higayon nga molurang na ang dautang panaon.

Panapos sa NGCP, mopahibaw ra sila sa banabana nga panahon kanus a makasugod sa pagpahiuli sa naguba nga linya. (rahc/pia7/Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.