By Rey Anthony Chiu | 10:41 AM April 04, 2022

Lima sa napulo ka mga kalungsuran nga naa sa top ten nga hing-grabehan sa paglampurnas sa bagyong Odette dinhi sa Bohol, parehas nga anaa sa ikaduhang distrito sa Bohol.

Gani sa ranking nga gihimo sa Shelter Cluster sa Provincial Disaster and Risk Reduction Management Council (PDRRMC), sa partial nga taho nga nakuha niini gikan sa kalungsuran, ang mga lungsod sa Ubay, Talibon, Inabanga, Getafe ug Trinidad ang nasulod sa top 10 sa ikaduhang distrito, samtang ang lungsod sa Carmen lamang ang sa Ikatulong Distrito nga nasulod sa listahan sa 10 ka labing apektado nga lungsod sa Bohol.

Ang nasulod sa 10 ka kalungsuran nga nakasinati og grabe nga kadaut bisan pa sa kakuwang sa mga taho nga nagsukad didto, mao ang Ubay, Talibon, Tubigon, Carmen, Inabanga, Loon, Trinidad, Tagbilaran City, Calape ug Getafe.

Sa unang distrito, nasulod ang kalungsuran sa Calape, Loon, Tagbilaran City ug Tubigon sa mingtaho ngadto sa PDRRM sa ilang mga kabalayan ug kabtangan nga nanga-butalid sa bagyo.

Sa Ubay, mingkabat sa 21,406 ka mga kabalayan ug mga estraktura ang gihukasan, gipalukapa ug gipalup-og sa bagto nga kang kinsang sentro, didto gyud mitadlas sa nasampit nga lungsod.

Mikabat isab sa 17,534 ka mga kabalayan ug mga gambalay ang nangaguba sa silingan nga lungsod sa Talibon, diin nasinati usab didto sa Poblacion area ang pagtaas sa dagat dala sa storn surge.

Sa Tubigon, 11,918 ka mga kabalayan ang napayhag, samtang ana a sa ika upat ang Carmen, nga may 11,528 ka kabalayan ang nahapay.

Ika lima nga lugar ang Inabanga, nga may 11,489 ka kabalayan ug gisaligang gambalay ang nangadaut sa bagyo.

Ika unom ang Loon nga may 10,340 ka kabalayanang naangin sa hangin ug uwan, segun sa taho nga nagsukad usab sa lungsod.

Anaa sa ika pito nga dapit ang Trinidad nga may 8814 ka kabalayan ang napayhag sa bagyo.

Ikawalo ang Tagbilaran City, dayun ang Calape nga may 8,444 ka kabalayan ang nadaut sa bagyo sa ikasiyam nga dapit.

Ika napulo ang Getafe, nga may 8242 ka kabalayan ang nagun-on sa bagyo.

Agi og tabang usab, ang National Housing Authority, mingtunol na ngadto sa governador sa Bohol sa P55 milyones nga abag sa mga nawad-an og balay sa katalagman.

Gawas sa NHA, ang Department of Budget and Management u gang Department of Social Welfare and Development, minggamit usab sa ilang mga pundo aron makatabang sa mga nawad-ag panimalay.

Ang lalawigan sa Bohol usab gikataho nga nanghatag og ayuda, samtang may mga kalungsuran nga nagpagawas sa ilang kamaayo sa pagdumala dihang nakapahigayon og malungtarong sistema sa tinabangay aron makabalay.

Sa kasamtangan, nangayo pa ang NHA og dugang pundo gikan sa Office of the President aron ikadugang sa unang hinabang nga gitanyag sa NHA, segun sa pahayag ni Grace Solis, hepe sa NHA Bohol. (rahc/PIA-7/Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.

%d bloggers like this: