By Rey Anthony Chiu | 06:54 PM November 23, 2021

Gitun-an na karon sa Bohol Inter Agency Task Force on the Management of Emerging Infectious Diseases ang pagtukas na sa daghang mga rekisitos kon mosulod sa Bohol ang usa ka menor de edad 11 anyos paubos.

Didto sa online nga Tigum sa BIATF Nobyembre 22, gibugtaw ni Provincial Administrator ug meeting presider nga si Atty. Katherin Pioquinto ang hunahuna sa paglibkas na sa mga panginahanglan aron makasulod ang bata nga menor de edad dinhi sa Bohol.

Kini usab sanglit ang mga 12 anyos ngadto sa 17 anyos, may makuha na nga mga bakuna hinungdan nga sayon na nila nga makapakita sa vaccination card, vaccination certificate ug uban pang mga gikinahanglang ipakita aron tugotan nga makasulod ug makasuroy sa Bohol.

Kahinumduman usab nga sa mga mosulod sa Bohol, ang mga 4 anyos pa ubos lamang ang dili na pangayoan pa og negatibo nga resulta sa coronavirus disease (Covid-19) test results pinaagi sa Reverse Transcription Polymerase Chain Reaction (RT-PCR).

Sa mga bakunado nan ga mosulod sa Bohol, igo na nga makapakita og valido ug authenticated nga copya sa vaccination certificate ug aprobado nga s-pass sa s-pass.ph ang gikinahanglan aron makasulod.

Sa mga dili bakunado, obligado pa gihapon nga mopakita sa negatibong resulta sa RT-PCR nga gikuha sulod sa 72 oras sa dili pa molawig paingon sa Bohol.

Mahimo usab nga, kon dili makakuha sa mas mahal nga RT-PCR, ang Saliva PCR nga makuha gikan sa Red Cross ang gamiton.
Gawas sa negatibong resulta sa Covid test, kinahanglan pa usab ang aprobado’ng s-pass aron makasulod.

Sa pagduso ni Atty Pioquinto sa nahisgutang laraw, mipadayag sa ilang pag-uyon ang tsirman sa Provincial Tourism Council nga si Atty. Lucas Nunag.

Matud ni Atty Nunag, ang sugyot makatabang pa pagbukas sa posibilidad nga ang mga gikinanan sa mga kabataan nga buot mosuroy, mapugos og pabakuna.

Segun sa tamdanan sa pagbyahe, kon ang menor de edad mobyahe kuyog sa usa ka hamtong, kon mahitabo nga magpositibo ang menor de edad sa pag-abut sa iyang destinasyon, obligado ang mga tinugyanan sa pagkwarantina sa bata, lakip na ang kauban nga hamtong, bisan pa kon kini walay sakit sa Covid.

Gipahinumdom ni Administrator Pioquinto nga ang kwarantina sa bata nga magpositibo sa Covid, molanat sa pito ka adlaw, ug sa kinatibuk-ang higayon, obligado ang hamtong nga uban sa bata nga mokuyog sa kwarantina.

Sa giduso nga sugyot, matud ni Atty Pioquinto, ila kini nga ipabati sa mga mayor, kinsa magtigum usab niining semanaha. (rahc/PIA-7/Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.