By Rey Anthony Chiu | 07:12 PM November 17, 2021

Kadtong mga trabahante nga dili bakunado apan nagsilbi sa frontline ug mangatubang sa mga tawo sa trabahoan o onsite nga mga gimbuhaton, kinahanglan na nga makapakita og regular nga resulta nga negatibo sila sa coronavirus disease (Covid-19), sa ilang kaugalingong gasto.

Kini samtang obligado na ang tanan nga establisemento ug mga trabahante niini sa publiko ug pribadong sector sa pagseguro nga ang mga trabahante niini nga nangatubang sa katawhan ug motungha sa trabahoan nga walay kabilinggan apan nagpagahi-gahi sa bagkuhag panalipod batok sa Covid-19, ilang kapabakunahan.

Ug kon ang empleyado, mapalta sa trabaho kay tua nipila sa pagpabakuna, dili kini isipon nga wala motungha.

Kini maoy tipik sa gihisgutan sa Resolution 148-B nga gipagawas sa National Inter Agency Task Force (NIATF) on the management of Emerging Infectious Disease, sa ilang ika 148 nga tigum niadtong Nobyembre 11, 2021.

Dili man mahimo nga taktakon sa trabaho ang mga empleyado ug trabahante nga pwede unta bakunahan apan nagdumili sa pagpabakuna, matud sa resolusyon, kinahanglan kining makapakita og regular nga resulta sa negatibo nga test sa Covid-19 pinaagi sa Reverse Transcription Polymerase Chain Reaction (RT-PCR) nga ilang gastohan kinaugalingon.

Dugang sa Resolusyon, kon walay igo nga RT-PCR ug lisud kining makuha, mahimo nga regular nga antigen test ang ilang ikapakita aropn makasulod sa trabaho-an.

Kon hinuon, may kaugalingon nga rason nga dili kabakunahan, kainahanglan lamang siya nga mopakita og medical certificate gikan sa Municipal, City o Provincial Health Officers o birth certificates, nga nahutang didto nganong dili siya pwede bakunahan.

Sa nagpadayon nga serbisyo sa mga pangpublikong panakyanan, isip dugang kondisyon, ang mga trabanate nga mismong nagpadagan sa pangpublikong panakyanan sa yuta, dagat ug hangin, kinahanglang pugson sa mga tagdumala nga makakuhag kompleto nga bakuna, aron makapadayan sa pagpadagan niini.

Hinuon, kadtong nagtanyag sa frontline ug emergency services, kinahanglan silang magpadayon sa ilang serbisyo sa paghatag og tabang sa tanan, mabakunado man o dili, subay sa nasampit nga resolusyon.

Subay niini, ang mga Lokal ga mga Kagamhanan hugot nga gimanduan sa pagpalusot og mga mandu ug mga ordinansa aron padaghanon pa ang magpabakuna pinaagi sa pagpatanyag sa mga insentibo alang sa mga nakakompleto na og bakuna, ug sa mga negosyo ug mga establisemento nga nagpatuman sa lagda sa pagpabakuna sa ilang mga kliyente ug mga customer. (rahc/PIA-7/Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.

%d bloggers like this: