By Rey Anthony Chiu | 07:55 PM October 26, 2021
Agi og pagpangandam sa mas daghan pang bakuna batok sa coronavirus disease (Covid-19) nga moabut sa Pilipinas, nahukman sa National Vaccine Operations Center (NVOC) nga palapdan pa ang mga magamit nga mga tawo aron makatabang sa pagpamakuna aron dali nga makab-ut sa nasud ang pagpabakuna sa 70% sa kinatibuk-ang populasyon.
Sa unang laraw sa Department of Health (DOH) nga magpatabang sa mga registered nga dentist isip kabahin sa mga vaccinators o manghatag sa bakuna.
Kini sanglit, sa kapasidad sa mga dentista, mahimong makadugang sila sa makahatag sa bakuna agig suporta sa nasudnong programa.
Subay niini, ang Professional Regulations Commission mipagawas na sa ilang baruganan kabahin sa laraw.
Matud sa PRC, ang Professional Regulatory Board of Dentistry (PRBOD) mipadayag nga ang mga dentist may igo na nga background aron makahimo sa pagpangbakuna sanglit nakakuha sila sa igo nga anatomical ug pisikal nga katakus ug katungod sa pag-inject sa tambal ug bisan pa gani sa anesthesia ug antihistamine.
Apan gisugyot pa gihapon sa PRBOD nga ang mga denstita nga gamiton, iagi usab og bansaybansay nga gikinahanglan subay sa gilagda sa DOH.
Pinaagi sa Advisory No. 97 sa NVOC, gipadayag na didto nga ang mga dentist mahimo na nga moalagad isip vaccinators ug volunteers sa mga vaccination teams sa mga LGU.
Kini human sila moagi sa us aka bansaybansay ubos sa DOH Health Academy subay sa online nga pamaagi o pinaagi sa mga Centers for Health and Development.
Samtang ang mga dentist ming volunteer isip vaccinator, ipailawom usab sila sa superbisyon sa usa ka medical doctor nga maoy mangulo sa Vaccine Implementing Unit o sa vaccination site. (rahc/PIA-7/Bohol)
