By Rey Anthony Chiu/PIA-Bohol | 08:00 PM August 16, 2021

Gimandu ni Bohol Gobernador Arthur Yap ngadto sa Provincial Administrator ang pagpangutana sa Philippine Genome Center sa University of the Philippines (UP-PGC), ngano nga dugay nga gipagawas ang resulta sa mga specimen nga gipadala sa Bohol ngadto kanila.

Kini human migawas niining bag-o pa lamang nga duha na ka kaso sa Delta Variant sa Coronavirus disease (Covid-19) ang namatikdan sa Bohol, gikan sa mga specimen nga gipadala sa mi-aging buwan.

Didto sa hiniusang tigum sa Provincial Peace and Order Council (PPOC) Anti Drug Abuse Council ug Task Force ELCAC, gipakita sa gobernador ang resulta sa kompirmasyon gikan sa UP-PGC nga may duha na ka kaso sa Covid dinhi sa Bohol nga ang Delta variant sa maong kagaw ang kina-ingnan.

Didto usab ang ikaduhang kompirmasyon kabahin sa labing una ug ikaduha nga kaso sa Delta Variant dinhi.

Segun sa resulta, namatikdan ang delta variant sa usa ka nasakit sa Covid-19 nga taga Ubujan District ning syudad base sa specimen nga gikan sa pasyente nga gipadala sa Bohol ngadto sa UP PGC alang sa genome sequencing ug analysis niadtong Hulyo 9, 2021.

Gitataw usab ni City Mayor John Geesnell Yap II nga usa lamang ug dili lima ka residente sa Tagbilaran ang nasayran nga nagdala na sa mas makalilisang nga delta variant.

Sa us aka pahibalo nga gipatik sa iyang face book page, matud ni Mayor Yap nga “naay na detect nga usa ka positive sa Delta variant dinhi sa Tagbilaran City. Brgy Ubujan,” unod sa bag-o nga post sa mayor. Kini sahi sa una niya nga gipaambit sa media niadtong una niyang gitaho nga lima ang Delta variant cases.

Sa gipakita sa gobernador, nasayran usab ang ikaduhang kaso sa delta variant dinhi ug kini anaa didto sa usa ka pasyente gikan sa lungsod sa Candijay.

Sa kaso sa taga Candijay, napadala ang specimen niini ngadto sa UP PGC niadto pang Hulyo 14, 2021.

Gikan sa una ug ika duha nga kaso, usa na ka buwan ang lanat sa panahon, panahon nga mahimong mas daghan na ang nanga-angin kon ugaling wala pa mapahiluna og tarong ang pasyente sa quarantine facility.

Tungod niini, dagway ug napikal ang gobernador sa kalangan sa pagpagawas sa UP PGC sa resulta sa mga specimen nga gipaagi sa genome sequencing aron ilhon ang matang sa kagaw nga nanakod.

Hinuon, dinhi usab sa Bohol, napikal usab ang pipila ka mga mayor tungod usab sa kalangan sa pagpagawas sa mga local nga molecular laboratories sa confirmative tests sa mga pasyente kon positibo ba o dili sa COVID, ilabi na niadtong namatay apan ang ilang tests, tanggong pa sa laboratory.

Gani, si Mayor Hilario Ayuban, nagsuwat na sa gobernador paghangyo nga tabangan sila nga mapalihok og una ang mga resulta sa labing dali nga panahon agi og paghatag pagtahud sa mga banay nga nagbangutan.

Niini nga mga sitwasyon, kon wala pay resulta, segun sa palisiya, isipon ang namatay nga positibo sa Covid, aron kapugngan ang pagtakodtakod kon ugaling positibo kini. (rahc/PIA-7/Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.