By Rey Anthony Chiu | 03:42 PM October 25, 2021
Temporaryo nga gitugot sa usa ka Executive Order ni Gobernador Arthur Yap ang paggamit sa mismo nga pirmado ug authenticated nga vaccination card nga gihatag sa Bohol, basta ubana kini og government issued ID ug aprobado’ng s-pass agi og hulip sa gikagubtan nga vaccination certificate.
Gawas niini, gikinahanglan nga makapakita ang maong byahedor nga pasulod sa Bohol sa acknowledgement notices o screenshot sa pahibaw nga wala pa makita ang records sa nagpabakuna, aron dawaton siya sa Bohol.
Sa Executive Order No. 52-A nga gipirmahan sa gobernador, Octubre 24, 2021, gipasabut nga ang pagtugot temporary lamang ug isipon sa pagka karon nga exception to the rule, ug dili mao na gayud ang patakaran, kay matud pa, ang tanan nga mga mobyahe, kinahanglan man nga makakuha sa iyang vaccination certificate gikan sa VaxCert.doh.gov.ph isip maoy gilagda sa resolusyon sa Inter Agency task Force.
Kahinumduman nga gipagawas sa Kapitolyo ang Executive Order No 52, nga nagtukas na sa rekisitos sa pagpakita sa negatibo nga resulta sa sakit sa coronavirus disease (Covid-19) pinaagi sa Reverse Transcription Polymerase Chain Reaction (RTPCR) test, isip nag-unang panginahanglan sa pagsulod sa Bohol sa mga tawo nga may kompleto na nga bakuna. .
Agi og hulip sa RT-PCR, gitugot na ang pagpakita sa Vaccination Certificate, apan kinahanglan nga kadtong nakuha gikan sa VaxCertPH, tungod sa nagkadaghang higayon nga may naghimo og mga peke nga mga dokumentos aron lamang makalabang sa Bohol.
Apan, human kini suwayi og kuha sa mga buot na unta nga mobyahe, kasagaran wala makakuha sa ilang vaccination certificate gikan sa vaxcert nga website sa Department of Health (DOH).
Matud pa sa gobernador, nga uwahi na niya nga nasayran nga daghan pa diay’ng vaccination data nga gikan sa mga kalungsuran nga wala pa masulod sa DOH website.
Rason sa mga LGUs, segun sa gobernadora, kuwang sila sa technical manpower mao nga wala pa nila ikapadala ang mga datus ngadto sa DOH.
Tungod niini, samtang nagpaabut nga kaaprobahan sa DOH ang mga requests alang sa vaccination certificate, kadtong mingbyahe na ug mopauli sa Bohol hangtud sa Nobyembre 30, makasulod sa Bohol kon makapakita sa ilang vaccination card.
Apan, gawas sa vaccination card, kinahanglan usab nga mapakita nga misuway gayud ang byahedor og kuha sa ilang vaccination certificate pinaagi sa pagpakita sa pruweba alang niini.
Ang pruweba, mao ang screenshot sa computer nga iyang giproseso ang iyang vaccination certificate pinaagi sa pag-upload sa scanned nga kopya sa iyang vaccination card ug ang kopya sa iyang usa ka government issued ID, ug ang notification ug acknowledgement gikan sa vaxcert.doh.gov.ph nga ang iyang gipangayo nga records, dili pa makit-an.
Dugang pa, gikinahanglan pa gihapon nga sa mosulod ang aprobado nga s-pass, nga iyang iduso dungan sa vaccination card, government issued ID, tubag gikan sa vaxcert.doh.gov.ph. (rahc/PIA-7.Bohol)
