By Rey Anthony Chiu | 11:23 AM October 01, 2021

Mitapos ang laing buwan sa pagpakigbugno sa coronavirus disease (Covid-19) kanus-a, ang gikaintapan nga mananakod nga sakit, nagbilin og 181 ka Bol-anon nga pamilyang nagbangutan.

Sa taho sa Bohol Inter-Agency task Force on the management of Emerging infectious Diseases (BIATF), napakita nga sa pagsugod sa September, diha nay 280 ka Bol-anon nga kinabuhi nga nakalas sa nahisgutang sakit.

Hangtud sa may alas 5:00 sa hapon, Septembre 30, natala ang ika 461 nga kaso sa pagkamatay tungod sa epekto sa Covid-19, subay sa taho sa Emergency Operations Center sa BIATF nga nagbase sa Provincial health Office.

Kahinumduman nga sa milabayng buwan sa Agosto, natapos ang buwan human natala sa Bohol ang 75 ka mga namatay, sulod sa usa ka buwan.

Kon sa buwan sa Agosto, nag average og 2.4 ka kaso sa pagkamatay sa matag adlaw, dako ang deperensya niini niining bag-ong natapos nga buwan.

Sa 181 ka mga natala nga namatay sa Covid sa Septembre, sobra sa 250 % ang umento sa kaso sa mga namatay.

Hinuon, sa laing bahin, namatikdan na nga katapusang duha ka semana sa Septembre nga mikunhod na ang mga nangabiktima sa Covid nga nahunosan sa kinabuhi.

Pananglitan, gikan sa BIATF-EID, mikabat sa 89 ka mga nangamatay sa Agusto 26 ngadto sa Septembre 11.

Gikan sa Septembre 12 ngadto sa Septembre 27, aduna lamay 84 ka nataho nga namatay.

Hinuon, sa usa ka disclaimer nga gisukip sa taho, matud sa BIATF, ang mga namatay, mahimong dili sa us aka adlaw lamang kon dili dugay na, apan bag-o lamang nataho.

Bisan pa niini, padayon pa gihapon ang pagpamakuna, sa tuyo nga hatagan nag panalipod ang katawhan batok sa Covid.

Kapin sa 90% sa mga nangamatay sa Covid ilabi na sa katapusang mga semana, wala mabakunahi o nagdumili sa pagpabakuna. (rahc/PIA-7/Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.