By Rey Anthony Chiu/PIA-Bohol | 12:32 AM September 17, 2021

Sulod sa lima ka adlaw, himoon sa kagamhanan ang Government Online Career Fair (GOCF), usa ka kalihukan nga magpatagbo sa mga ahensya sa kagamhanan ug mga nagpangita pa og kapanarbaho-an, matud sa Civil Service Commission (CSC) Bohol Field Office. 

Didto sa Kapihan sa PIA, gibutyag ni CSC Bohol Director Alice May Parcon nga sa panahon sa pandemya, ang GOCF usa ka virtual online platform sa pagpapatik sa mga kasayuran sa mga bakante nga trabaho sa goberno, sulod lamang sa lima ka adlaw. 

Mahitabo sa Septembre 20-24, ang GOCF usa sa mga kalihukan nga magtimaan sa ika 121 nga Anibersaryo sa Philippine Civil Service, sa pagpakig-alayon sa JobStreet.com, dugang niya.

Niining higayona, ang mga ahensya sa kagamhanan sa mga nagkadaiyang rehiyon magtumbok ug pagpabukas sa mga kritikal nga pwesto ug wala pa mapasudli nga bakante sa ilang mga buhatan lakip na ang mga rekisitos niini, aron macomply sa mga nangitag trabaho. 

Alang niini, kadtong mga nangita pa og trabaho gikan sa bisan hain man nga rehoyon mahimo’ng moduso sa ilang applications ug mga dokumento nga magsuporta sa ilang aplikasyon segun sa panginahanglan sa posisyon. 

Ang application iduso pinaagi sa online. 

Una na nga giawhag ang mga ahensya sa pagrehistro sa ilang mga bakante nga posisyon hangtud niadtong Septembre 8, samtang alang sa mga nangitag kapanarbaho-an, makasugod og sulod sa buksan nga link sa http://www.csc.gov.ph sugod Sept 20-25. 

Tumong sa GOCF 2021 mao ang pagpasulod sa mga sobra na ang kwalipekasyon nga mga civil service eligible ngadto sa mga ahensya nga nangita pa. 

Buot usab niini ang pagrecruit ug pagpahiluna sa mga may abilidad nga nga bag-ong graduate ug nangitag trabaho sa goberno, pagpahiluna sa platform aron makapahibaw ang mga ahensya sa ilang kakuwang sa pagpasulod sa lisud kasudlang mga posisyon ug pagpa-abante sa kahigayunan sa pagpuno sa mga bakante nga posisyon nga lisud pasudlan. 

Gawas pa, tumong usab niini ang pagpadugang sa kapilian sa kapanarbahoan ilabi na sa panahon nga daghan ang nangatangtang sa trabaho tungod sa pandemya, nga nangita og trabaho sa goberno, Pinoy man nga ania dinhi o sa gawas sa nasud, pasabut sa CSC. 

Alang sa mga nangitag kasudloang trabaho, gikinahanglan nila nga maghimo og  account sa JobStreet, pinaagi sa paghimo og kauganlingong account pinaagi sa “libre nga pagsign-up” nga makita sa screen sa JobStreet.com.ph ug mosunod lang sa mga panudlo didto. 

Kon may JobStreet account na, moadto na dayon sa http://www.csc.gov.ph ug pindoton ang banner icon nga 2021 GOCF aron makasulod sa landing page sa GOCF. 

Didto, magdownload sa Personal Data Sheet (PDS) nga Excel ang Format, sudlan ang mga gikinahanglan nga kasayuran sa PDS, ug kausahon og upload ngadto sa e-resume. 

Makit-an usab didto ang mga ahensya nga misalmot sa GOCF mao nga makit-an na usab ang mga bakante nga posisyon nga kapilian nga aplayan.

Kon makapili na, iduso ang application pinaagi sa pagpindot sa Apply Button nga makit-an sa kina-ubosan nga bahin sa page sa ahensya nga nangitag trabahante. 

Matud pa sa CSC, ang ahensya nga nga giaplayan ang mohimo sa una nga pagtimbangtimbang ug pagpahibaw sa mga aplikante pinaagi sa text o email, sa sitwasyon sa application ug dugang mga mga instructions o rekisitos nga kinahanglan nga icomply sa aplikante. 

Niini, giaghat sa CSC ang mga kwalipekado segun sa gikinahanglang trabaho, apil na ang mga persons with disabilities, sakop sa mga tribu, ug sa bisan unsa nga sexual nga orientation, gender identity ug expression (SOGIE), sa pagpanimpalad didto. (rahc/PIA-7/Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.