By Rey Anthony Chiu/PIA-Bohol | 03:31 PM August 05, 2021

Hugot nga gidid-an sa Department of Health (DOH) National Vaccination Operations Center (NVOC) ang pagpila samtang nag-ubog sa tubig aron lamang magpabakuna.

Gani, matud pa, gikinahanglan nga may luwas ug uga nga lugar alang sa mopila alang sa pamakuna.

Kini maoy unod sa NVOC Advisory No. 69, nga naglatid sa giya kabahin sa pagpang-apud-apod sa Covid-19 vaccine ug sa kampanya sa pagpabakuna ilabi na sa mga lugar nga gibahaan ug naa sa kusog nga uwan.

Ang Advisory, matud pa sa NVOC gipagawas aron maghatag og giya sa tanan nga Regional ug Local Vaccination Operation Center (R/LVOCs), tanan nga Implementing Units ug Vaccination Sites sa ilang pagpatuman sa mga kalihukan sa pamakuna didto sa mga lugar nga nabahaan o giuwan og kusog.

Matud pa sa Advisory, sa panahon sa katalagman, ang kaluwasan sa mga tigpamakuna ug sa mga bakunahan maoy unahon.

Gawas niini, kinahanglan usab nga ipaseguro ang pagkaluwas sa bakuna batok sa COVID-19 subay sa girekomenta nga rekisitos niini subay sa gikinahanglang pagtipig sa saktong kabugnawon.

Niini, ang mga Local Government Units (LGU) o LVOCs kinahanglang ipaneguro nga ang ilang gipili nga lugar bakunahan ug ang mga duol nga dapit niini, dili masanapan sa tubig.

Ang LGU na ang mangita sa laing lugar kabalhinan ug ibalhin dayun ang pamakuna ngadto sa luwas nga dapit.

Kon dili possible ang pagbalhin, sugyot sa NVOC nga ipa-oktaba na lang una ang pamakuna hangtud nga pwede na nga luwas nga ibalik ang kalihukan, ug pahibaw-on ang mga nakalinya na alang sa pamakuna, sa mga katikaran.

Gimanduan na usab ang mga LGUS nga ipaseguro nga inoras ang scheduling sa mga tawo nga bakunahan aron mawala na ang mga tag-as nga pila.

Subay usab niini, gimanduan ang RVOCs sa pagpakigsabut sa mga LVOCs, magmonitor sa pagpatuman sa kalihukan sa pamakuna sa mga bakunahanan ug magpadangat sa regular nga mga updates sa mga apektadong lugar.

Gikinahanglan usab ang mga RVOCs ug LVOCs nga makigsabut sa local ug regional Disaster Risk Reduction and Management Offices ug uban pang kaubanan aron magkasinabot sa mga angay buhaton niining mga higayona.

Ang nahisgutan nga Advisory gipirmahan ni Usec Myrna C. Cabotaje Undersecretary ug hepe sa Field Implementation and Coordination Team, samtang chair usab sa National Vaccine Operations Center. (rahc/PIA-7/Bohol)

By Bohol Island News

Your reliable source of news and content in the island and the rest of Central Visayas and Mindanao.

Leave a Reply

This site uses Akismet to reduce spam. Learn how your comment data is processed.