By Rey Anthony Chiu/PIA-Bohol |07:22 PM August 05, 2021
Duha ka semana nga pagpangandam ang gipahiluna sa Bohol pinaagi sa bag-ong Orden Ehekutibo, aron makapalig-on sa katawhan ilabi na kadtong anaa sa labing delikado nga kahimtang kon makasulod man ugaling ang delta variant sa coronavirus disease (Covid-19).
Pinaagi sa Executive Order No. 37, series of 2021, gipahiluna ang duha ka semana nga lugway aron makaginhawa ang Bohol sa pagpanawat sa mga gikan sa gawas, ug makapakusog pa sa pagpamakuna sa mga senior citizens, mga tawo nga may daan nan ga gipamati sa lawas ug mga trabahante sa gawas sa nasud nga molarga na sa dili madugay.
Matud pa sa mga tinugyanan sa Kapitolyo, ang duha ka semana nga gitagana sugod Agosto 6 ngadto sa Agosto 20, subay sa EO 37, series of 2020, maghatag sa 14 ka adlaw nga agresibong paghiusa sa mga lakang sa Bohol ug sa local nga kagamhanan aron ipaubos ang kasamtangang taas nga mga kaso sa coronavirus disease.
Kini pinaagi sa mas agresibo nga testing, contact tracing, paggamit sa Temporary Treatment ug Monitoring Facilities gawas sa syudad ug pag-kab-ot sa mga angayan mabakunahan aron makapalig-on sa ilang panalipod sa lawas batok sa sakit.
Sa pagtuon sa Department of Health, nakita nga kadtong nabakunahan ug nakakompleto sa duha ka tupokan sa bakuna abtol sa COVID-19, nakalahutay batok sa Delta variant, nga una nan ga mihipos sa kapid-an ka kinabuhi sa mga nasud nga nasudlan niini.
Dugang sa DOH, kadtong nakalabang sa duha ka semana human makadawat sa duha ka tupokan sa bakuna, wala na ngani manginahanglan pang isulod sa tambalanan dihang natakdan sa Covid- 19 delta variant, kay yano lamang ug gani ang uban, wala na makagawas ang simtomas sa sakit bisag natakdan.
Kasagaran sa mga nangamatay, kadtong mga wala mabakunahi, dugang sa ahensya sa kasanihan.
Sa duha ka semana, temporaryo nga pugngan sa mga tinugyanan sa Bohol: gikan sa mga nasudnonga ahensya nga nasangonan sa gimbuhaton, ngadto sa mga local nga kagamhanan, ang pagpasulod sa mga byahe sa bapor ug eroplano, ug pagbantay sa mga utlanan niini aron walay makasulod nga mahimong magdala sa gikahadlokan nga sakit, taliwala usab sa gipahugtan usab nga lagda sa pagbyahe sa ubang dapit sa kapupud-an. (rahc/PIA-7/Bohol)
